02.02.12
Udin, ai 2 di Fevrâr – Domenie ai 5 di Fevrâr a Glemone, aes 5 dopomisdì, inte sale conferencis de Comunitât montane, Riccardo De Infanti al presentarà il Strolic Furlan dal 2012 metût adun di Gloria De Angeli sul teme dal sport tal mont de disabilitât. ARC/EP
01.02.12
Udin, 1 di Fevrâr - La tarvisiane Eurograf e la cjase editorie Vivalda di Torin a àn burît fûr di pôc un gnûf libri che al conte des bielecis e maraveis dal teritori di confin indulà si incrosin lis trê lenghis e culturis dal Friûl Vignesie Julie: furlan, sloven e todesc. "Le Alpi Giulie e il Tarvisiano", volum di 256 pagjinis, nol è però il solit libri di un autôr che al dâ la sô personâl interpretazion di un teritori ma un sfuarç corâl di 47 personis - studiôs o passionâts locâi - che a àn cirût di fotografâ une vision complete e origjinâl. Nol è il prin libri su Tarvisian e Val Cjanâl ma il tai de opare, che e scandaie vot argoments - la foreste di Tarvis, i nemâi, lis monts, lis escursions, la culture alpine, la storie des lenghis e etniis e lis fiestis popolârs - a fasin di chest volum (che al met adun ancje fotografiis di cualitât) un biel mût di profondî un teritori inmagant dal Friûl Vignesie Julie. ARC/EP
31.01.12
Udin, ai 31 di Zenâr - Voltâ Cicerone e Erodoto in marilenghe: une ocasion uniche par meti adun lenghis classichis e europeanis. Al è timp fin ai 30 di Avrîl dal 2012, di fat, par partecipâ ai concors dâts fûr de Societât Filologjiche Furlane pai students des scuelis superiôrs dal Friûl. La X edizion dal Concors di traduzion des lenghis classichis, grêc e latin, al furlan, promovût in colaborazion cu la Associazion "Gli Stelliniani" e cul liceu classic "Jacopo Stellini" di Udin e dal concors Lenghis 2012, II edizion, pe traduzion in furlan di tescj leteraris des lenghis europeanis, in particolâr todesc e inglês. Ducj doi i concors a àn vude la poie Ufici Scolastic Regjonâl pal Friûl Vignesie Julie e des Provinciis di Gurize, Pordenon e Udin. A son dôs categoriis di partecipazion par ogni lenghe, une pai students dai prins doi agns di scuele e une par chei dai ultins trê agns. I tescj di voltâ si puedin domandâ tes sedis de Filologjiche o ben discjariâju dal sît internet www.filologicafriulana.it, li che si cjate ancje il regolament par intîr e al è spiegât cemût partecipâ. Lis traduzions des lenghis classichis a varan di jessi mandadis li dal Liceu classic "Jacopo Stellini" (place I Maggio, 26 Udin) e chês des lenghis modernis a varan di rivâ invezit li de Societât Filologjiche Furlane (vie Manin, 18 Udin).La Jurie e valutarà, dongje de ricjece e de coretece de lenghe furlane, ancje la cualitât de traduzion e la atenzion linguistiche e gramaticâl rispiet al test origjinâl; i vincidôrs a varan tant che premi libris publicâts de Societât Filologjiche e la cerimonie di premiazion si tignarà in ocasion de tradizionâl Fraie de Vierte. Par informazions tel. 0432 501598. ARC/EP
30.01.12
Udin, ai 30 di Zenâr - Al è vignût fûr il bant de novesime edizion dal Concors par Tescj Cinematografics in Lenghe Furlane organizât dal CEC – Centro Espressioni Cinematgografiche cul finanziament de ARLeF (Agjenzie Regjonâl pe Lenghe Furlane), de Provincie di Udin e dal Comun di Udin. Il regolament al previôt cuatri sezions competitivis: une pes senegjaturis, cuntun prin premi di 1.300 euros, une pes storiis par film (al plui 10 cartelis) cuntun prin premi di 300 euros, une pai articui di critiche (300 euros pal prin premi) e, par finî, une pai saçs sul cine (prin premi di 300 euros). I tescj a àn di jessi scrits in lenghe furlane rispietant lis normis de grafie uficiâl e par furlan comun. A son ametudis lis varietâts locâls intai dialics des senegjaturis che, in ogni mût, a àn di jessi scrits inte grafie uficiâl. I lavôrs a varan di rivâ li de sede dal CEC (in vie Villalta, 24 a Udin) dentri dai 14 di Setembar dal 2012 e in forme anonime. I lavôrs premiâts e chei segnalâts a saran publicâts inte riviste di cine Segnâi di lûs e intal mês di Dicembar dal 2012 e sarà organizade li dal Visionario di Udin une serade speciâl pe premiazion. Dongje dai premis za citâts al vignarà dât ancje il premi “Mario Quargnolo” che il CEC di Udin al destine ogni doi agns a chei che si son fats cognossi intal setôr dal cine in lenghe furlane pe sô realizazion e/o promozion. Intant de serade a saran proietâts films di vuê e di archivi (chei chi in colaborazion cu la Cineteca del Friuli). Cun di plui, vie pe cerimonie di premiazion, al sarà presentât l’ultin numar de riviste Segnâi di lûs e il tierç volum de golaine “Segnâi di lûs”, publicât pe ocasion, dedicât cheste volte aes localizazions cinematografichis in Friûl, a Triest, in Slovenie e in Istrie. Il volum curât di Carlo Gaberscek, al sarà publicât in trê lenghis: furlan, talian e sloven e al varà il titul di “I lûcs dal cine (cine di finzion in Friûl, a Triest, in Slovenie e in Istrie: sets e localizazions)”. La partecipazion al Concors e je sore nuie. Par informazions www.mostredalcine.org (leam “Gnovis”). ARC/EP
29.01.12
Udin, ai 29 di Zenâr - A son viertis lis iscrizions par frecuentâ i cors pratic di lenghe e culture furlane, inmaneâts de Societât Filologjiche Furlane cu la poie de Agjenzie Regjonâl pe Lenghe Furlane (ARLeF). Lis lezions a trataran argoments di grafie, gramatiche, leterature, storie, art e tradizions popolârs. La frecuence al cors e je libare e di bants e nol covente savê il furlan. Il cors di Udin – te sede de Filologjiche in vie Manin 18 – si è bielzà inviât miercus ai 26 di Zenâr e al larà indevant, cun orari 17.00-19.00, fin a la metât di Avrîl (12 incuintris, une volte par setemane). Il docent al sarà Gianni Sergio Pascoli: a la fin dal cors al vignarà consegnât un certificât di frecuence a chei arlêfs che a varan partecipât a almancul il 70 par cent des oris di lezions. Tancj altris cors di furlan a son daûr a partî in cetancj comuns dal Friûl, di Pordenon, a Gurize, a la Cjargne: par informazions sui oraris e sui calendaris des lezions e par notâsi, cjalâ sul sît internet www.filologicafriulana.it, tal menu Formazion - Corsi pratics, o ben telefonâ ai Uficis Culture o a lis Bibliotechis dai Comuns interessâts o al Ufici Formazion de Filologjiche (tel. 0432 501598 int. 3). ARC/EP
27.01.12
Udin, ai 27 di Zenâr - Di cualchi setemane l'Arlef- Agjenzie regjonâl pe lenghe furlane e à inviât la distribuzion dal Grant Dizionari Bilengâl Talian Furlan (GDB TF) tes scuelis e tes bibliotechis de regjon. Presentât ae fin di Otubar stât e stampât in 1.900 copiis su cjarte in sîs volums e su CD, il Dizionari al rapresente il plui grant investiment di politiche linguistiche pe lenghe furlane volût de Regjon: une opare che e à impegnât dîs agns di lavôr e studi di cetancj esperts. Considerât strument strategjic pe tutele e promozion dal furlan il GDB TF al ven par chest distribuît sore nuie tes scuelis des trê provinciis furlanis e tes bibliotechis di dut il Friûl Vignesie Julie e consegnât a personaçs de culture furlane e des istituzions (il president de Regjon, Renzo Tondo, par prin). Il Dizionari al met adun 63.500 lemis furlan e tal 2005 al è stât pandût su CD in 5 mil copiis. Tal 2006 invezit al è stât metût a disposizion par mieç dal sît web dal CFL2000 www.cfl2000.net e inzornât vie par ogni an cun gnovis peraulis. "La distribuzion di cumò e va a sierâ l'impuartant progjet di difusion de lenghe furlane uficiâl; par chest - al comente il president dal Arlef, Lorenzo Zanon - al jere doverôs donâlu a cui che al rapresente sore il dut l'avignì de lenghe, ven a stâi i fruts e i lûcs di culture sul teritori". ARC/EP
26.01.12
Udin, ai 26 di Zenâr - Une iniziative che e met adun la tradizion - l'ûs dal furlan - cul vuê e l'avignì - gnûfs media e social network tant che sms, twitter e facebook.
Cussì l'assessôr regjonâl ae Culture, Elio De Anna, al à definît il concors "In trê riis" inmaneât de associazion culturâl “Colonos” e bandît in colaborazion cun ARLeF, Agjenzie regjonâl pe lenghe furlane e presentât te sede de Regjon a Udin ae presince dal president de associazion di Vilecjace di Lestice, Federico Rossi, dal president de jurie, carlo Tolazzi e dal diretôr de Arlef William Cisilino. La tierce edizion dal concors par romançs in lenghe furlane clamât "In trê riis", idee gjavade di une invenzion leterarie dal scritôr francês Felix Feneon (1861 - 1944), e rivuarde tescj di narative par furlan: storiis che a àn di sei ineditis, scritis inte grafie uficiâl e cun cualsisedi varietât linguistiche, cuntune lungjece massime di 180 batudis (cjapant dentri ancje i spazis). Il regolament dal bant al proviôt che si puedi partecipâ intune des dôs sezions (fintremai ai 16 agns e dai 17 ai 35) fasint rivâ dentri de miezegnot dai 15 di Mai dal 2012 une e-mail ae direzion info@colonos.it cul test in alegât. Al prin classificât de sezion 16 agns i vignarà dât un smartphone Samsung ACE (o ecuivalent). Il prin classificât de sezion dai 17 ai 35 agns al concuistarà un iPad2 32 GBApple (premi speciâl de jurie premiât cun publicazions editadis de associazion culturâl Colonos). Il bant si lu cjate sul sît www.colonos.it o par vê altris informazions tel/fax 348 1015830 - info@colonos.it - ARC/EP
11.01.12
Udin, ai 11 di Zenâr - Ancje il president de Arlef, Agjenzie regjonâl pe lenghe furlane, al firme la poie ae manifestazions par rivâ ae assegnazion dai beneficis de leç Bacchelli al poete furlan Pierluigi Cappello. Cappello - si leç intune note uficiâl - al è un dai personaçs plui impuartants a nivel regjonâl e talian de culture dal Friûl Vignesie Julie. La sô produzion leterarie in poesie, par talian e par furlan, e je di unic valôr. "Al è impuartant - al comente Zanon - par ducj i furlans ma non dome che Pierluigi Cappello al continui a fâ ce che al à fat fin cumò. Par chest al è impuartant che si rivi a vê il sostegn par lui". ARC/EP
10.01.12
Udin, ai 11 di Zenâr - A tornin a tacâ lis ativitâts dal sportel sorecomunâl pe lenghe furlane di Glemone par cont de associazion intercomunâl dai comuns di Bordan, Montenars, Trasaghis, Vençon. Il sportel, cun referente Linda Picco, al è viert al public tai municipis dai comuns associâts in chestis zornadis e oraris: Glemone: lunis e martars, 9.00-13.00; tel. 0432.973234; urp@com-gemona-del-friuli.regione.fvg.it; Vençon: miercus, 14.30-17.30; tel. 0432.985266; sportello.friulano.venzone@gmail.com; Bordan: joibe, 9.00-13.00; tel. 0432.988049 (int. 614); sportello.friulano@com-bordano.regione.fvg.it; Montenârs: prin vinars di ogni mês, 9.00-13.00; tel. 0432.981209. ARC/EP
06.01.12
Udin, ai 6 di Zenâr – Al è di 144 mil euros il finanziament che la Direzion regjonâl culture e à stanzât pes televisions e radio dal Friûl Vignesie Julie par realizâ trasmissions e programs in lenghe furlane seont ce che e proviôt la leç di tutele regjonâl (29/2007). I bêçs a son stâts dividûts jenfri vot televisions e trê radio: 12 mil a Free; 10 mil e 300 a Telefriuli; 10 mil a Video Pordenone; 9 mil e 800 a Trieste oggi, 9 mil 800 a Telequattro, 9 mil e 400 a Telepordenone; 6 mil e 850 a Telealtobut; 6 mil e 850 a Telemare. I 66 mil 555 euros pes radios a son stâts assegnâts a Radio Onde Furlane (43 mil e 55 euro); Radio Spazio (15 mil e 900) e Radio voce nel deserto (7 mil e 600). ARC/EP
15.12.11
Udin, ai 15 di Dicembar - Sienziâts di dute Europe si cjataran vinars ai 16 di Dicembar a Udin in ocasion de Conference Internazionâl “Lenghis minoritariis e comunicazion sientifiche” organizade de Societât Sientifiche e Tecnologjiche Furlane (SSTeF) par celebrâ il decenâl de sô fondazion. La conference, che si tignarà des 9.00 aes 18.30 te Sale Cunvignis “R. Gusmani” di Palaç Antonini, vie Petracco 4, Universitât dal Friûl, e viodarà la partecipazion di rapresentants des plui impuartantis lenghis minoritariis europeanis, che si confrontaran su lis rispetivis esperiencis sul ûs de lenghe tal insegnament, te ricercje e te pratiche professionâl in ambit tecnic-sientific (in zonte, une schede dai relatôrs forescj). Nassude tal 2001 par iniziative di studiôs des diviersis dissiplinis sientifichis dal Ateneu dal Friûl, la SSTeF (www.siencis-par-furlan.net) e je une associazion indipendente che e je impegnade a doprâ la lenghe furlane par incressi la ricercje sientifiche e tecnologjiche e contribuî al disvilup culturâl dal Friûl. Dal 2002 la SSTeF e publiche il semestrâl Gjornâl Furlan des Siencis / Friulian Journal of Science, riviste sientifiche furlan/inglês che e presente voris origjinâls di ricercje e di divulgazion su dissiplinis e argoments sientifics e tecnologjics plui gnûfs. Ae riviste a colaborin ricercjadôrs e studiôs che a lavorin te universitât e in altris istituzions di ricercje, in Friûl e tal forest. ARC/EP
14.12.11
Udin, ai 14 di Dicembar - Vinars ai 16 di Dicembar, aes 20.00, inte sale consiliâr dal municipi di Rude, al vignarà presentât il "Lunari 2012 i paîs sot dal tor di Aquilee", scrit in lenghe furlane par cure di Giorgio Milocco, Maurizio Puntin, don Ottone Brach e la grafiche di Maurizio Barut. La publicazion, che e sarà presentade di Ferruccio Tassin de Associazion "Terre sul Confine", passâts plui di vincj agns di vite, e ripropon lis pagjinis de storie e lis imagjinis de int intun senari che, partint di Aquilee e de posizion culturâl e gjeografiche de Basse Furlane, al met adun l'interès locâl cui grancj panoramis internazionâi. ARC/EP
13.12.11
Udin, ai 13 di Dicembar - Al è vignût fûr il numar 10 de riviste di cine in lenghe furlane “Segnâi di lûs”. La publicazione e ten dentri une sezion dute dedicade al festival e aes cinematografiis intes lenghis “minorizadis”, in particolâr cuntune serie di articui dedicâts al cine catalan plui resint e ai siei sucès a nivel internazionâi, ae figure e ae opare dal pionîr dal cine galizian Chano Piñeiro, al progjet basc Kimuak su la difusion dal curtmetraç, sul cine furlan che al à par teme la nestre emigrazion, dongje di un articul sul cine sart scrit di Tore Cubeddu diretôr dal Babel Film Festival di Cagliari/Casteddu e une interviste cul regjist sart (presint a Udin) Simone Contu. La riviste, che e ven fûr une volte l’an a tacâ dal 2001, al ripuarte ancje doi articui di Carli Pup: un che al ilustre in mût precîs chel cine basc che si è di resint ocupât de repression des feminis in Euskadi ai timps dal franchisim e un dal film Hunger (une opare mestre dal cine, premiât ancje al festival di Cannes e mai distribuît in Italie) sui siopars de fam de bande dai separatiscj irlandês inte preson di Long Kesh. Segnâi di lûs al va indenant a publicâ la passionade ricercje di Carlo Gaberscek dai lûcs dulà che a son stâts zirâts films inte nestre tiere o intes tieris dongje di nô. Marcello De Stefano al staze in maniere puntuâl il cine di Marco Bellocchio marcantint aspiets che lu svicinin a di un mût di fâ cine des “minorancis”. Nassude cun chê di publicâ lis voris premiadis intal Concors par Tescj cinematografics in lenghe furlane, chest numar al publiche il saç di Francesco Della Mora “Une ridade par simpri” sul film di Murnau Der letzte Mann e il scrit di Raffaele Serafini “Arbui vistûts”. A proposit dal concors, simpri inte riviste si pues cjatâ il bant de prossime edizion cu la scjadince di presentazion des voris. La riviste (dutun cul catalic de Mostre) si pues cjatâ li dal Visionario o li de sede dal CEC di Udin. Cualchi pagjine si pues visionâle ancje sul sît de Mostre dal Cine: www.mostredalcine.org - ARC/EP
12.12.11
Udin, ai 12 di Dicembar - Il President de Societât Filologjiche Furlane Lorenzo Pelizzo al veve za visât, in ocasion de presentazion dal Strolic furlan pal 2012, che la Filologjiche e varès promovût une racuelte di firmis tra dutis lis personis che si son sintudis ofindudis di bande di Paolo Villaggio. Di fat tal so ultin libri “Mi dichi. Prontuario comico della lingua italiana”, il comic di Gjenue al veve fatis afermazions vonde grivis cuintri il popul furlan. Fevelant de marilenghe, in particolâr, cun peraulis une vore volgârs al veve definît i furlans tant che un popul “incapace di esprimersi in italiano” e che al fevele “una lingua fossile impressionante”. “Firmant chest document – si lei tant che motivazion sul sfuei di racuelte des firmis – o vuei esprimi il gno disdegn rivuart lis afermazions di Paolo Villaggio in riferiment al popul furlan, ven a stâi ofesis dal non dai Furlans, che a passin il confin de satire e infamin une culture, une lenghe e un teritori”. La Filologjiche ur domande duncje a ducj i socis, amîs e a ducj i Furlans che si sintin ofindûts par chestis peraulis di vignî a firmâ la petizion intune des sôs sedis, a Udin (in vie Manin 18), a Gurize (in vie Bellini 3) o a Pordenon (in cors Garibaldi 75/1). ARC/EP
![web tv [il collegamento aprirà una nuova finestra]](/rafvg/export/sites/default/RAFVG/notiziedallagiunta/img/fvgTV1.gif)
![archivio fotografico [il collegamento aprirà una nuova finestra]](/rafvg/export/sites/default/RAFVG/notiziedallagiunta/img/archivioFoto4.gif)
![collegamento al sito della Carta regionale dei servizi [il collegamento aprirà una nuova finestra]](http://www.regione.fvg.it/rafvg/export/sites/default/RAFVG/hp-new/box1/img/carta_regionale_dei_servizi.gif){kind=small}