gnovis
Sat Jun 07 14:38:00 CEST 2025
Scuele de infanzie: ARLeF e consegne gnûf materiâl didatic
Udin, ai 6 di Jugn - In chestis setemanis e je tacade la consegne, a passe 600 classis de scuele de infanzie, di materiâl didatic e informatîf de bande de ARLeF – Agjenzie regjonâl pe lenghe furlane. E je une operazion che e ven daûr di chê fate l’an passât, cuant che a son stâts dâts fûr i posters educatîfs di Anìn e che si zonte aes ativitâts che la Agjenzie e promôf intal setôr scolastic. In chest câs specific, la distribuzion, sore nuie, e à cjapât dentri 233 scuelis de infanzie dal teritori di lenghe furlane, ven a stâi 174 istitûts comprensîfs e 59 scuelis paritariis.
Sedi ai piçui arlêfs che ai insegnants a son stâts furnîts materiâi che a podaran supuartâ la ativitât di insegnament dal furlan. Dai albums par colorâ ai audiolibris cun filastrocjis par furlan, dai dvd ai posters; cun di plui ancje tantis schedis didatichis coloradis pensadis propit pai plui piçui, che a judaran i insegnants tal stimolâ frutis e fruts in maniere dinamiche e divertente. La distribuzion si è sielt di fâle ae fin dal cicli scolastic par permeti di tornâ a tacâ tal mês di Setembar cuntune grande selezion di materiâi za a disposizion dai docents.
Cheste gnove distribuzion e rapresente la implementazion naturâl di un progjet plui grant che, de fin dal 2022 incà, al à impegnât la ARLeF te distribuzion sore nuie, in ocasion di ogni an scolastic, dal Manuâl pal insegnament de lenghe furlane “Anìn!” intes scuelis primariis. Chest, di fat, al è il prin manuâl pensât par compagnâ i arlêfs a scuvierzi il furlan, lis particolaritâts dal teritori dal Friûl, la sô storie e la sô culture. Il progjet al è promovût de ARLeF par meti in vore il Plan gjenerâl di politiche linguistiche pe lenghe furlane 2021-2025 de Regjon Autonome Friûl-Vignesie Julie. Il volum al è dât fûr a gratis a ducj i arlêfs de scuele primarie che i lôr gjenitôrs a àn aderît al insegnament de lenghe furlane tant che previodût de leç 482/99 e de leç regjonâl 29/2007.
ARC/EP
Sun Apr 13 17:07:00 CEST 2025
Tutele des minorancis: delegazion dal Consei di Europe si confronte cun ARLeF
Udin, ai 11 di Avrîl - Si è tignût a Udin, te sede de Regjon Autonome Friûl-Vignesie Julie, un incuintri impuartant tra la Agjenzie regjonâl pe lenghe furlane (ARLeF) e il Comitât consultîf indipendent su la Convenzion cuadri dal Consei di Europe pe protezion des minorancis nazionâls. La visite de delegazion e fâs part dal percors di valutazion dal 6t Rapuart di Stât su la metude in vore de Convenzion, che la Italie e à ratificât tal 1997 e che e tutele dutis trê lis lenghis minoritariis de Regjon: il furlan, il sloven e il todesc.
I components de delegazion – Ingeborg Birnie – Havenga (Paîs Bas), Erzsébet Sándor – Szalay (Ongjarie) e Detlev Rein (Gjermanie), acompagnâts di Maxime Huot dal Segretariât dal Consei di Europe – a àn scoltât cun atenzion une relazion detaiade su lis azions plui impuartantis metudis in vore par tutelâ la lenghe furlane intai ultins cinc agns.
Tal incuintri, si son discutûts tancj aspiets peâts ae promozion e ae protezion dai dirits linguistics, massime par chel che al tocje l’ûs dal furlan te aministrazion publiche, te istruzion e intai media. Si son presentadis la storie e la evoluzion de lenghe furlane, de nassite fin al so ricognossiment uficiâl.
La delegazion e à fat domandis su la organizazion dal insegnament dal furlan intai diferents grâts scolastics, su la adesion dai students, sui materiâi didatics a disposizion e su la formazion dai insegnants. Cun di plui, si è fevelât dai finanziaments pe lenghe furlane, dal ûs dal furlan intai rapuarts cu lis fuarcis dal ordin e inte sanitât e ancje de presince de lenghe intai social media, su la stampe e sul lavôr.
A son stadis cjapadis in esam ancje lis dificoltâts leadis ae mancjade aprovazion dal messâl in lenghe furlane. Tra i elements plui inovatîfs che a son stâts frontâts, la atenzion si è concentrade sul disvilup di gnovis tecnologjiis par furlan e sul fat che a son aziendis privadis che a doprin la lenghe furlane intes lôr ativitâts. Il Comitât al à pandût il so interès pes tematichis che a son vignudis fûr dilunc dal incuintri e si è imprometût di lâ inmò plui insot tai argoments tratâts.
ARC/EP
Wed Apr 09 19:13:00 CEST 2025
Minorancis: visite in Fvj pe atuazion de Convenzion cuadri dal Consei di Europe
Udin, ai 8 di Avrîl - La ativitât pe difese e la valorizazion des lenghis minoritariis dal Friûl Vignesie Julie e je stade al centri di un incuintri, che si è fat vuê dopomisdì intal palaç de Regjon a Triest ae presince dal assessôr regjonâl aes Autonomiis locâls cun deleghe aes Lenghis minoritariis, il sindic di Triest, il diretôr de Agjenzie regjonâl pe lenghe furlanis e rapresentants dal Comitât consuntîf indipendent su lis Convenzions cuadri e dal Consei di Europe.
Une ocasion di confront sui ultins disvilups che a rivuardin la promozion, la protezion e la atuazion dai dirits garantîts de Convenzion cuadri dal Consei di Europe pe protezion des minorancis nazionâls.
Tra i diviers temis condividûts, il rapresentant de Zonte regjonâl al à specificât cemût che in Friûl Vignesie Julie a sedin atîfs tancj sportei linguistics di lenghe furlane e slovene par favorî il dialic tra citadins e aministrazion publiche, citant i finanziaments erogâts par integrâ lis ufiertis formativis scolastichis cun ativitât di insegnament des lenghis minoritariis dal teritori. In particolâr, e je stade ricuardade la viertidure resinte a Tarvis de prime scuele cuadrilengâl de regjon.
Intal cors dal 2025 al è in program sul teritori regjonâl un cicli di conferencis dreçât a monitorâ lis ativitâts di promoziozione e difese racuelte in cjamp pes trê lenghis minoritariis, che al larà daûr di un incuintri finâl par fâ il pont su lis buinis pratichis di podê disvilupâ in futûr.
La delegazion vuê a Triest e larà indevant in chescj dîs cu la proprie visite in Italie par valutâ il 6° Rapuart di Stât su la atuazion de Convenzion cuadri dal Consei di Europe pe protezion des minorancis nazionâls, publicât l'an passât dal ministeri dal Interni, sintint i rapresentants istituzionâi, i ents e lis associazions che a gravitin ator des diviersis minorancis nazionâls.
ARC/EP
Wed Nov 06 14:41:00 CET 2024
Cors di lenghe furlane: ai 11 di Novembar al tache par dipendents publics
Udin, ai 6 di Novembar - A tornin a scomençâ i cors di lenghe furlane inmaneâts dal Centri Interdipartimentâl pal svilup de lenghe e de culture dal Friûl (CIRF) de Universitât dal Friûl e indreçâts ai dipendents de Aministrazion Publiche.
Cui 11 di Novembar, di fat, al tacarà l’ultin dai cors previodûts pal 2024, che al larà indevant fin ai 16 di Dicembar, intes zornadis di lunis e miercus des 14.30 aes 17.30 par un totâl di 30 oris di lezion, dividudis in 10 incuintris. La ativitât formative si davuelzarà in linie, su plateforme informatiche Microsoft Teams. Ai corsiscj che a passaran l’esam finâl e che a varan frecuentât almancul l’80% des oris ur vignarà dât un atestât di frecuence.
Daûr des domandis, al vignarà ativât un percors di nivel di fonde (nozions di fonde de grafie uficiâl e de gramatiche de lenghe furlane), di nivel intermedi (par rinfuarçâ il lessic e par aprofondî lis regulis di grafie e di gramatiche) o di nivel avanzât (nozions avanzadis di lenghe furlane, lengaç aministratîf, legjislazion des lenghis minoritariis).
La iniziative e je metude in vore in gracie de leç 482 dai 15 di Dicembar dal 1999 (“pe tutele des minorancis linguistichis storichis”), e e rapresente un strument zovevul par chei che a lavorin intun Ent Public tal teritori furlanofon e che a àn voie di insiorâ lis lôr competencis linguistichis e duncje ancje il contat cui utents. Cun di plui, si metin in vore ancje lis indicazions de L. R. 29/2007, che e previôt di doprâ la lenghe furlane intai ents publics e intes societâts di servizis ae popolazion.
Par altris informazions e par notâsi si pues contatâ la segretarie organizative dal CIRF al numar 0432-556480 o pûr mandâ un messaç di pueste eletroniche a cirf@uniud.it (segretarie dal CIRF) o ben a sportel.furlan@uniud.it. Si pues discjamâ il modul di iscrizion dal sît https://cirf.uniud.it.
ARC/EP
Wed Nov 06 14:40:00 CET 2024
Campagne di comunicazion: ARLeF e ponte su youtubers
Udin, ai 18 di Otubar - “No stâ a fâti contâ la storie dal ors: ven su YoupalTubo!”. Al è chest il sproc che la ARLeF - Agjenzie regjonâl pe lenghe furlane e à sielzût pe gnove campagne di promozion che e tacarà cui 18 di Otubar. Une detule che si cjatarà in ducj i media, ma soredut tai social networks, che a son il mieç di comunicazion plui doprât dai zovins.
La iniziative e je stade presentade de ARLeF ae presince dal assessôr regjonâl aes Autonomiis locâls, Pierpaolo Roberti. A jerin presints Chei di Udin (ven a stâi Mattia Cantarutti e Federico Iob), doi dai zovins protagoniscj de campagne, in rapresentance dai fantats e des fantatis di YoupalTubo e Max Sganga, innomenât youtuber triestin.
La ARLeF si indrece ancjemò une volte ai zovins cuntune impuartante iniziative promozionâl. La Agjenzie e lavore za di timp a infuartî chest leam, ancje daûr dal Plan gjenerâl di politiche linguistiche fat bon de Regjon. Lis Gjenerazions Z e Alpha a son di fat un “public” impuartant che al domande atenzion e progjets di comunicazion digjitâl. Ve che alore i testemonis plui adats a son propit i youtubers furlans, che a presentin cun sucès contignûts creatîfs bogns di cjapâ dentri i zovins, ma no dome.
La strategjie comunicative de campagne de ARLeF e tache propit dai social: di TikTok a Facebook, tocjant Instagram e YouTube, cence dismenteâsi di WhatsApp. E propit tai social si fevelarà sigûr dal video di Mattia Cantarutti e Federico Iob (“Chei di Udin”): “Parlare friulano a Trieste”. Lant daûr di un format di YoupalTubo che al à tant sucès, “Chei di Udin” a àn domandât ai triestins, e tra chei ancje al innomenât “coleghe” Max Sganga, di misurâsi cu la lenghe furlane. Il risultât al è un “Quiz Mortâl” une vore sureâl e divertent, che al regale tantis ridadis.
Par television, invezit, al è previodût un spot di 30 seconts, un concentrât di tocuts di videos di YoupalTubo che al pant une vore ben la ricjece di contignûts dal canâl. Ancje il spot radiofonic, come chel televisîf e la campagne Adv, al invide il public a stâi daûr al canâl.
Su la stampe, infin, il protagonist al è un ors fûr dal ordenari: scufis stereo grandis tes orelis e vistîts in stîl rap. Al clame la atenzion dai letôrs, rimandant ae detule furlane No stâ a fâti contâ la storie dal ors: ven su YoupalTubo!. La campagne e je completade di un depliant che al marche i aspiets plui impuartants dal canâl.
ARC/EP
Wed Nov 06 14:37:00 CET 2024
Utents ator pal mont: doi cors di furlan in lenghe inglese e spagnole de Sff
Udin, ai 22 di Otubar - Creâ un puint tra il Friûl e lis comunitâts di emigrâts tal forest e i lôr dissendents, metint a disposizion un strument par imparâ la lenghe ma soredut ufrint une oportunitât par scoltâ il furlan e par esercitâsi a fevelâlu.
Al è chest un dai obietîfs de prime edizion dai doi cors gratuits di lenghe furlane metûts in pîts de Societât Filologjiche Furlane, cul finanziament de Agjenzie Regjonâl pe Lenghe Furlane e in colaborazion cul Ent Friûl intal Mont.
A tacâ des 9 di buinore dai 28 di Otubar al vignarà ativât il “Basic course of Friulian language”, destinât a un public di lenghe inglese, soredut par chei che si cjatin intai Stâts Unîts, Canadà o Australie (ma ancje par chei che a doprin l’inglês tant che lenghe francje e a varessin gust di svicinâsi al furlan), intant che ai 29 di Otubar, aes 5 daspò misdì, e vignarà fate la presentazion dal “Curso básico di lengua furlane”, in lenghe spagnole, cun target specific i utents de Americhe Latine.
Il percors formatîf al varà une durade di dîs setemanis, li che i corsiscj a podaran cognossi lis regulis di base de grafie e de gramatiche furlane, cence dismenteâ i elements fondamentâi pe comunicazion, adun cun curiositâts e mûts di dî doprâts in Friûl.
Si pues partecipâ a dutis lis lezions in maniere asincrone. Ogni unitât e je struturade intune prime part dedicade ae scolte, cuntun audio di podê tornâ a scoltâ e cu la pussibilitât di esercitâsi intal tornâ a pronunziâ lis frasis, ancje in gracie dal test dai dialics di podê scjariâ tra i materiâi. Ae fin, e je previodude une prove di comprension orâl. Intune seconde sezion, il student al cjatarà i videos là che i tutors a sclarissin lis regulis gramaticâls, doprant la lenghe furlane e la lenghe veicolâr dal cors. Simpri presint l'aprofondiment comunicatîf, par imparâ in maniere graduâl a esprimisi te juste maniere in lenghe furlane (dai salûts e presentazions, aes ativitâts vie pe zornade, fin a descrivi la famee, orientâsi intai lûcs, ordenâ al ristorant o contâ ce che si fâs tal timp libar). Ducj i materiâi presentâts dilunc des videolezions a son a disposizion in formât PDF inte sezion di pueste. Par podê acedi aes setemanis seguitivis bisugne scjariâ la schede dai esercizis e completâle, di mût di podê visualizâ la soluzion dai esercizis e confrontâle cun ce che si à fat, intune autovalutazion dal propri aprendiment.
Vie par dut il percors, al sarà simpri pussibil domandâ sclariments midiant dal forum di pueste ai diviers tutors (Ada Bier e Elena De Sanctis pe lenghe spagnole, Michele Calligaris e Serena Fogolini pe lenghe inglese), che i corsiscj “a cjataran”, ancje se dome in modalitât virtuâl, intai sportei di conversazion, là che a varan la ocasion par esercitâsi sedi inte scolte che intal dialic.
I modui pe iscrizion a son a disposizion inte sezion “Lenghe furlane” dal sît de Societât Filologjiche Furlane, a chest leam: https://www.filologicafriulana.it/corso-pratico-on-line/
Par informazions e prenotazions, 0432 501598, interni 3, o formazione@filologicafriulana.it.
ARC/EP
