gnovis
Udin, ai 12 di Dicembar - Doman, aes 13.30, inte sede dal Consei regjonâl a Triest, e sarà screade dongje la Aule consiliâr la rassegne storiche su “Automimismo e Regjonalisimo” tra il 1945 e il 1947 curade di Gianfranco Ellero e inmaneade de Societât Filologjiche Furlane e dal Consei regjonâl.
La esposizion e disvilupe il dibatiment politic e culturâl tra i partîts dal Friûl Vignesie Julie e il stes confront inte Assemblee costituente che al puartât al ricognossiment de specialitât e intal 1963 ae aprovazion dal Statût di Autonomie de Regjon.
ARC/EP
Jansky, il grup che al à vinçût la edizion 2018 di Suns Europe
Udin, ai 3 di Dicembar - La musiche eletroniche dai Jansky, grup che al ven dai Paîs catalans, e à vinçût la edizion 2018 di Suns Europe, il Festival des lenghis minoritariis che sabide si è tignût al Teatri Gnûf Zuan di Udin. La jurie tecniche e à volût premiâ il duet che al ven de isule di Maiorche «pe origjinalitât e la capacitât di coniugâ poesie e inovazion». Secont puest par Yr Ods dal Gales, esponents de sene indiis rock, e Martine Iori de Val di Fasse. E propit chest ultime, espression de minorance ladine, e à vinçût il premi dal public.
Une vore preseadis lis esibizions di Lune e un Cuart dal Friûl, il Dario Hess dal Cjanton dai Grisons, Laura Hoo de minorance svedese de Finlande, Espiño de Galizie, Rodeo dai Paîs Bascs, Melissa Meewisse de Basse Sassonie.«La serade e je stade maraveose, il nivel musicâl al jere une vore alt», al à comentât Leo Virgjilis, diretôr artistic dal event. Tal cors de serade, organizade de Cooperative di Informazion furlane cooperative cu la poie finanziarie de Arlef, de Regjon Fvj, dal Comun di Udin e de Fondazion Friûl, al è stât consegnât un ricognossiment speciâl al regjist Asier Altuna, consegnât dal diretôr de Arlef, Wiliam Cisilino, “a cui di 25 agns al lavore intal cjamp dal audiovisîf e dal cine contant il mont basc cun fuarce comunicative, abilitât e origjinalitât”. ARC/EP
Te foto: Martina Iori
Udin, ai 30 di Novembar - Ae vie uficiâl usgnot, vinars ai 30 di Novembar, al Yardie di Pradaman – cun concierts di finaliscj ancje tai teatris di Orsarie e Cormons e tal auditorium di Listize – il festival Suns, progjet de informazion Furlane Cooperative cu la poie finanziarie de Arlef, de Regjon, dal Comun di Udin e de Fondazion Friûl, cul patrocini dal Consei di Europe e de NPLD, la rêt europeane pe promozion de diversitât linguistiche.
Dut pront par sabide al 1 di Dicembar, pal grant conciert al teatri Giovanni da Udine, une serade fate di musichis diviersis, no folcloristichis, ma zovinis e coragjosis, modernis ancje doprant lenghis cetant antighis: sul palc, oltri ai parons di cjase dal Friûl, Lune e un Cuart, a saran Dario Hess dal Cjanton dai Grisons, Jansky dai Paîs Catalans, Laura Hoo de minorance svedese de Finlande, i galizians Espiño e i bascs Rodeo, Yr Ods dal Gales, Melissa Meewisse de Basse Sassonie e la stele ladine Martina Iori. ARC/EP
Udin, ai 30 di Novembar – Al è stât aprovât de Zonte regjonâl il ripart di 532mila euro di fonts statâi pe ativazion di sportei linguistics par todesc e furlan e pe creazion de Assemblee de comunitât linguistiche todescje.
La plui part dai fonts, ven a stâi 390.229 euros, a saran destinâts ae Arlef-Agjenzie regjonâl pe lenghe furlane par garantî il funzionament dal Sportel linguistic regjonâl dedicât ae lenghe furlane pai prossims doi agns. Intal specific, 80.229 euros a vignaran doprâts pe anualitât 2019 e
310.000 euros pal 2020.
In plui, 142.000 euros a laran a sostignî lis ativitâts in lenghe todescje pe anualitât 2018: in particolâr, 90.000 euros a saran assegnâts ai ents locâi dai teritoris dulà che e je presinte la minorance di lenghe todescje che a àn presentât progjets pe ativazion/prosecuzion di sportei linguistics, cors di formazion linguistiche pai dipendents e la realizazion di sîts web istituzionâi, cartelonistiche istituzionâl e stradâl.
I altris 52.000 euros a saran doprâts pe istituzion dal sportel linguistic regjonâl pe lenghe todescje e par sostignî la ativitât de gnove Assemblee de comunitât linguistiche todescje. L'orghin, che al sarà costituît in curt, al viodarà la adesion dai Comuns di Sapade, Sauris, Paluce, Tarvis, Malborghet e Ponteibe.
ARC/EP
Eros Cisilino
Udin, ai 24 di Novembar - L'assessôr regjonâl aes Autonomiis locâls cun deleghe aes lenghis minoritariis, Pierpaolo Roberti, al à comunicât ae Zonte la propueste di nomine di Eros Cisilino come gnûf president de Arlef - Agjenzie regjonâl pe lenghe furlane.
Impleât aministratîf al Consorzi di bonifiche (UD) e prime dipendent dal Ent regjonâl disvilup agricul di Codroip, Cisilino al è stât conseîr provinciâl dal 2013 al 2018 e prime vicesindic e assessôr dal Comun di Merêt. Za president dal 2001 al 2005 de associazion "La Grame", ricognossude de Regjon Fvj pe valorizazion e la tutele de lenghe furlane, al è stât coordenadôr editoriâl e autôr di publicazions par talian e furlan.
La Zonte regjonâl e à dât mandât al Ufici di Gabinet di proviodi ae domande di parê ae Zonte des nominis dal Consei regjonâl.
ARC/EP
Foto senza didascalia
Udin, ai 16 di Novembar - E scomence domenie ai 18 di Novembar la seconde edizion di “FRUTS! Festival de leterature pe infanzie in lenghe furlane” organizât dal Docuscuele-Centro di documentazion e sperimentazion didatiche pe scuele furlane, che e viôt il lavôr sinergjic de ARLeF, ent finanziadôr, e de Societât Filologjiche Furlane cu la colaborazion dal Ufici Scolastic Regjonâl. Chest an la rassegne e je costruide tor dal teme de leture cun laboratoris pes scuelis, incuintris di formazion e apontaments pes fameis. La manifestazion si sierarà ai 6 di Dicembar, dì di Sant Nicolau, cuntun avigniment speciâl.
Il libri protagonist de propueste laboratoriâl pes scuelis al è il “Drâc di Udin”, progjet editoriâl curât di Radio Spazi cun ilustrazions e storie di Luigino Peressini e dai fruts de scuele de infanzie Mario Andretta di Lignan. La storie e vignarà lete e interpretade intun laboratori teatrâl dal atôr Michele Polo intes scuelis che a fasaran domande. Il prin apontament viert a ducj al è fissât par domenie ai 18 di Novembar aes 11 a palaç Mantica a Udin te sede Filologjiche cui cuatri amîs di “La zirafe cui ocjâi” e lis lôr incursions di lenghe furlane inte leture des storiis ilustradis plui sorprendentis de editorie pe infanzie cul acompagnament musicâl.
Di martars ai 20 di Novembar il festival si sposte a Glemone pe setemane “Nati per leggere” cu la presentazion dal cd “Audioflabis par furlan” inmaneade de aministrazion locâl cun Radio Onde Furlane. Lis vôs che a contin a son chês dai atôrs Aida Talliente e Michele Polo che a learan une flabe de tradizion, voltade par furlan, in dutis lis scuelis de infanzie dal Glemonat e a presentaran il cd intun incuintri viert a fruts e fameis joibe ai 22 di Novembar aes 17.30 a Palaç Elti.
Il program al previôt trê seminaris formatîfs pai insegnants: il prin si tignarà a Palaç Mantica ai 29 di Novembar cun Luigino Peressini par imparâ il so mût di lei il teritori e tradusilu in ilustrazions e tescj; il secont al sarà in Fondazion Friûl vinars ai 30 di Novembar cun Davide Zoletto che al darà des propuestis pedagogjichis par considerâ la lenghe furlane tant che spazi inclusîf a scuele; infin, l'ultin apontament al è pai 3 di Dicembar a Sant Vît dal Tiliment cun Monica Aguzzi che e darà dutis lis dretis par une leture buine di atirâ la atenzion dai fruts. Dut il program e lis modalitâts di iscrizion ai avigniments su www.scuelefurlane.it o ae pagjine facebook di Docuscuele.
ARC/EP
La presentazion di Suns Europe 2018 te sede de Regjon FVG a Udin
Udin, ai 14 di Novembar - Aromai rivât ae cuarte edizion Suns Europe al à ben clâr i siei obietîfs: 'Dirit ae lenghe, dirit ae diversitât'. Ancje di chest si è fevelât in ocasion de presentazion uficiâl dal event, in program in Friûl dai 29 di Novembar ai 2 di Dicembar.
"Un festival che al olse simpri cun propuestis artistichis di cualitât e di inovazion, che a plasin ai zovins: chest al è impuartant par veicolâ la ricjece espressive des lenghis minoritariis e l’idee di une Europe che e sa fâ de diversitât une fuarce”, al à comentât in mert a Suns l’assessôr regjionâl aes Autonomiis locâls cun deleghe a lis lenghis minoritariis Pierpaolo Roberti.
Suns Europe al è un progjet de cooperative Informazion Furlane cu la poie finanziarie de ARLeF - Agjenzie Regjonâl pe Lenghe Furlane, de Regjon Autonome Friûl Vignesie Julie, dal Comun di Udin e de Fondazion Friuli che ancje chest an si conferme il principâl festival european che al conte e al fâs cognossi, a ducj, lis lenghis minorizadis, al pont di gjoldi dal Patrocini dal Consei de Europe e di NPLD - Network to Promote Linguistic Diversity, la rêt europeane pe promozion de diversitât linguistiche.
Il concierton, anime de manifestazion, ancje chest an (sabide il prin di Dicembar, des 21, al Teatri Gnûf Giovanni da Udine) al viodarà sul palc dongje dai parons di cjase dal Friûl (Luna e un Quarto) artiscj che a vegnin dal Cjanton dai Grisons (Dario Hess), dai Paîs Catalans (Jansky), ma ancje de minorance svedese de Finlande (Laura Hoo), e po dopo de Galizie (Espiño), dal Paîs Basc (Rodeo), dal Gales (Yr Ods), de Basse Sassonie (Melissa Meewisse) e de Ladinie (Martina Iori).
A presentâ obietîfs e novitâts a son stâts il diretôr artistic Leo Virgili, il diretôr de ARLeF, William Cisilino, il president de cooperative Informazion Furlane Carli Pup: i dîs dal festival, no son plui trê, ma cuatri; lis ambientazions no dome il Teatron ma ancje il Yardie di Pradaman (ai 29 di Novembar, des 21) dulà che si tignarà la fieste di benvignût; i teatris di Orsarie e Cormons, e l'auditorium di Listize (ducj i trê ai 30 di Novembar, aes 21) animâts di diviers concierts; la librarie Tarantola di Udin (il 1n di Dicembar aes 18) che e ospitarà l’incuintri 'Contâ dissegnâ scrivi', cui vincidôrs dal Premi San Simon 2018.
Confermade ancje chest an, invezit, ‘Scuele Europe’: une lezion-conciert dedicade aes scuelis secondariis furlanis dulà che si fevelarà di dirits, Europe e diversitât linguistiche. Altre grande novitât di cheste edizion e je la zornade di domenie ai 2 di Dicembar che si davuelzarà al Teatri San Giorgio di Udin. Dut il program e lis informazions si cjatin su www.sunseurope.com e su la pagjine Facebook 'SUNS Europe'.
ARC/EP
Udin, ai 12 di Novembar - Il nunzi apostolic Diego Causero al à celebrât la messe in lenghe furlane in ocasion de fieste dal patron e dal marcjadut di solidarietât a Midiuce. Un segnâl di viertidure in merit ae domande che e rive de comunitât catoliche furlane di podê scoltâ e preâ la peraule di Diu par furlan. Di plui di cuarante agns il clericât al spiete di fat il placet de bande de Conference episcopâl taliane pe traduzion dal Messâl roman in lenghe furlane.
Intal 1974 intal cûr de Cjargne, inte plêf alpine di Sant Pieri di Zui, al fo un storic incuintri tra i predis cjargnei e furlans che a vevin sometût uficialmentri ai vescui la domande di podê celebrâ la messe ai propris fedêi in lenghe
Udin, ai 26 di Otubar – A tornin a inviâsi di Novembar i cors di lenghe furlane organizâts dal Centri interdipartimentâl pal disvilup de lenghe e de culture dal Friûl (Cirf) de Universitât di Udin pai dipendents de aministrazion publiche.
I cors a son struturâts su trê nivei – base, intermedi e avanzât – e a scomençaran vinars ai 16 di Novembar e a laran indevant fin ai 20 di Dicembar, par un totâl di 30 oris di lezion e à ripartît in 10 incuintris (zornadis: lunis, joibe e vinars). Par iscrizions e informazions contatâ la segretarie organizative dal Cirf, telefonant al numar 0432 556480 o vie email ai indreçaments cirf@uniud.it o sporte.furlan@uniud.it.
ARC/EP
Udin, ai 22 di Otubar - A Suns Europe, progjet de informazion Furlane Cooperative cu la poie finanziarie di Arlef, Regjon, Comun di Udin e Fondazion Friûl, chest an lis musichis dal europop si alternaran ai ritmis dal country folk e ai sunôrs dal post rock, ma no dome: dai 29 di Novembar ai 2 di Dicembar, a Udin, protagoniscj a saran musiciscj, regjiscj, scritôrs e atôrs che a vegnin di mieze Europe.
Di là dai parons di cjase dal Friûl, i artiscj che si esibiran in ocasion de manifestazion rivade ae cuarte edizion a rivin dal Cjanton dai Grisons, dai Paîs Catalans, ma ancje de minorance svedese de Finlande, e dopo di Galizie, Paîs Basc, Gales, Basse Sassonie e Ladinie.
Ducj a presentaran la lôr art, ma ancje la lôr lenghe minorizade. Ancje chest an al sarà un confront fra lenghis cuntune storie antighe e formis di comunicazion modernis e contemporaniis. Un Festival fat di art, contaminazion, talent, pluralisim linguistic, creativitât. L'apontament al è simpri al Teatri Gnûf Zuan di Udin (in program ancje avigniments colaterâi moltepliçs in diviersis ambientazions butadis in citât), cuant che a jessi protagoniscj a saran la musiche, cine, teatri e leterature declinâts intes lenghis minoritariis.
Fin ai 29 di Otubar e je ancje la pussibilitât di jentrâ a fâ part dal grup dai volontaris scrivint la domande dal sît www.sunseurope.com. Al sarà cussì pussibil lassâsi contaminâ de atmosfere dal festival che chest an si propon cun tantis novitâts tacant dal program, che al viodarà des piçulis grandis "rivoluzions"; des zornadis (cuatri e no plui trê), des ambientazions (al sarà fra chês altris ancje il Teatri Sant Zorç: fin ae serade event, cûr di Suns Europe, no plui apontament conclusîf.
Program e informazion su www.sunseurope.com e su la pagjine Facebook "SUNS Europe".
ARC/EP
Udin, ai 13 di Otubar - Di lunis ai 15 a vinars ai 19 di Otubar si fasarà a Cividât (UD) il Meeting Transnazionâl dai arlêfs e la formazion comune dai docents di Italie, Spagne e Cravuazie, i trê Stâts includûts in "RUSH - Re and Up Skilling Horizons", progjet de EU centrât sul valôr culturâl dal plurilinguisim e su la impuartance des lenghis minoritariis te istruzion. Coordenadôrs dal progjet a son il Convit Nazionâl Paolo Diacono di Cividât, il Comun di Cividât e la ARLeF, che a lôr si son zontâts pe Galizie (Spagne) l’Ent regjon e dôs scuelis, pe Cravuazie la Union des minorancis e la scuele di Rovigno. Un totâl di vot partners tra ents istituzionâi e Scuelis primariis e secondariis di prin grât.
La tape di Otubar e segne la formazion des primis classis transnazionâls cun arlêfs che a vegnin des trê Regjons (furlane, galiziane e istriane), inte scuele primarie (classis 4a e 4b) e inte scuele secondarie di prin grât (classis 2a e 2b), cun frecuence integrade plurilengâl par une setemane. Pai arlêfs a son previodudis cinc zornadis intune suaze di plurilinguisim, plenis di moments di condivision in classe e sul teritori, cun laboratoris, ativitâts ludichis, ativitâts didatichis integradis, visitis vuidadis intai lûcs storics e de Grande Vuere, e un percors naturalistic su lis rivis dal Nadison. Il program dal Meeting Transnazionâl pai docents, che si daran adun te Aule Magne dal Liceu Classic Paolo Diacono intal cûr di Cividât, al previôt incuintris cun esperts, ativitât di confront di ideis, ativitâts laboratoriâls pe costruzion di modui comuns, analisi de normative e des politichis sul insegnament plurilengâl cul ûs des lenghis minoritariis, confronts su modei scolastics e carateristichis didatichis de scuele primarie e secondarie di prin grât, e cognossince dai teritoris plurilengâi. In particolâr, lunis ai 15 di Otubar, dopo dai salûts di Patrizia Pavatti, dirigjente dal Convit Paolo Diacono e di William Cisilino, diretôr de ARLeF, a saran i intervents di Marco Stolfo, gjornalist espert di lenghis minoritariis, sul teme “Lenghis e lenghis minoritariis: rivendicazions, normativis, politichis e problemis” e dal gjornalist Carli Pup su “Lenghis Minorizadis e modei scolastics.
ARC/EP
Udin, ai 11 di Otubar - Doman, vinars ai 12 di Otubar, e torne in onde su Telefriuli “Maman!” cuntun apontament dopli: la tierce stagjon de trasmission televisive dute par furlan, risultât di une coproduzion de Agjenzie Regjonâl pe Lenghe Furlane- Arlef e di Telefriuli, e tache vinars aes 17.45, cun replichis il miercus e la domenie.
Condutoris e coautoris de stagjon televisive a son di gnûf Daria Miani, e la atore Chiara Donada. Insiemi a intratignaran i fruts cun zûcs, curiositâts e contis bielonis, compagnadis des cjançons origjinâls scritis di Daria Miani e metudis in musiche di Flaviano Miani. Cun lôr a tornin ancje lis aventuris di “Tui e Tuie”, che a àn apassionât i piçui spetatôrs te stagjon passade. Si trate di une serie che e à vût cetant sucès – lade in onde in Australie e in Gnove Zelande su Disney Channel – che e je stade dopleade di pueste par furlan.
Il secont apontament al è, simpri ducj i vinars, cu la pagjine “Maman!” sul setemanâl Il Friuli. Daspò de polse estive, la edizion su cjarte di Maman! – nassude in colaborazion cu la ARLeF tal mês di Dicembar stât e ancje chê dute in lenghe furlane - e torne cuntune grafiche gnove e plasevule, siore di zûcs, curiositâts, filastrocjis, sugjeriments pe leture e, sigûr, ancje cu lis gnovis aventuris di Vigji, il gjat che in dutis lis trasmissions tv i ten compagnie a Daria Miani.
Midiant dal divertiment, de narazion e dal zûc, l’obietîf comun des dôs “musis” di Maman! al è chel di meti in contat i fruts cul plurilinguisim e i siei vantaçs cognitîfs comprovâts che a vegnin dal doprâ plui lenghis in de etât plui tenare. ARC/EP
Valter Sivilotti
Udin, 1n di Otubar - Dopo cualchi mês di lavôr de Mitteleurope orchestre e de Corâl dal Friûl VJ, l'Imni dal Friûl "Incuintri al doman" al vignarà sunât pe prime volte sabide ai 6 di Otubar, aes 21, intal domo di Lignan, in graciis de disponibilitât dal Comun. Intai dîs dopo, dopo, a saran disponibii i spartîts in ben dodis declinazions (orchestre, bande, corâls...) e si podarà scoltâ e scjariâ l’audio de esecuzion dal sît de Arlef-Agjenzie regionâl pe lenghe Furlane (www.arlef.it). "Al è l'at conclusîf dal progjet che Arlef - al ricuarde il diretôr William Cisilino - e veve inviât in ocasion de Fieste de Patrie dal Friûl a Voleson Darzin intal Avrîl passât, cuant che al jere stât anunziât il toc vincidôr dal concors". L'imni, componût pe part musicâl dal mestri Valter Sivilotti e pe part testuâl di Renât Stroili Gurisatti al veve vinçût su dîs concorints. La prime esecuzion e vignarà fate in ocasion dal conciert che la Mitteleurope orchestre (cui siei 47 musiciscj, direts di Marc Guidarini) e tignarà a Lignan e al precedarà, in maniere significative, la esecuzion de Novesime sinfonie di Beethoven che e conten l' "Imni ae gjonde" che al è ancje l'Imni de Europe Unide. La esecuzion vocâl e sarà par cure de Corâl dal Friûl Vignesie Julie, cui siei 60 components, direts dal mestri Cristiano Dall’Oste. ARC/EP
Udin, ai 24 di Setembar - Promovi la diversitât culturâl e linguistiche, incoragjâ lis personis di dutis lis etâts a imparâ lis lenghis - stant che fevelânt plui di une al facilite lis relazions e al jude a cjatâ lavôr e a fâ cressi lis impresis -, sensibilizâ ae grande varietât di lenghis in Europe. E je cheste une part dai obietîfs de Zornade europeane des lenghis: “Unîts inte diversitât”. Une ricorence istituide dal Consei di Europe che, dal 2001, si ten ogni an ai 26 di Setembar par celebrâ la diversitât linguistiche dal Vieri Continent dulà che plui di 50 milions di personis a fevelin plui o mancul 60 lenghis minoritariis (lis trê lenghis di minorance de nestre regjon – furlan, sloven e todesc - a fasin part di chest grup). Une iniziative che nol podeve no aderî la ARLeF (Agjenzie Regjonâl pe Lenghe Furlane) organizant un moment di divulgazion, a Udin, miercus ai 26 di Setembar (des 10.00 aes 18.00), devant dal Palaç comunâl, in vie Lionello, cuntun stand e cu la presince di volontaris che a distribuiran, a gratis, materiâl informatîf e gadgets. I obietîfs gjenerâi de Zornade a son chei di informâ il public plui larc su la impuartance dal plurilinguisim; di promovi, tutelâ e favorî lis diversitâts linguistichis e, infin, di incoragjâ lis personis a imparâ plui lenghis dilunc de vite, a cualsisedi etât e par cualsisedi reson. Imparâ lis lenghis di altris popui nus jude a capî miôr lis variis culturis e a superâ lis diferencis. Il Consei di Europe si augure che cheste Zornade e vegni celebrade a ducj i nivei: dai citadins singui, ma ancje dal mont de scuele, de comunicazion e de politiche. La acuisizion des competencis linguistichis, inte atualitât, a son une dibisugne comune e un dirit universâl. Par plui informazions su la Zornade, su dutis lis iniziativis organizadis in Europe e par scjariâ materiâi didatics e informatîfs, si pues navigâ intal sît www.coe.int/edl. ARC/EP
Il stand de Arlef a Friuli Doc a Udin.
Udin, ai 14 di Setembar - La ARLeF - Agjenzie Regjonâl pe Lenghe Furlane e rinove la presince a Friûl Doc cul spazi “Lenghe doc dal Friûl”, dedicât ae promozion, ae informazion e ae distribuzion di materiâi par furlan. Il bancut istituzionâl si cjatarà intal cûr de fieste, a doi pas de Loze dal Lionel, propit sul imprin dai spazis dal Ersa, che a son logâts dilunc de vie Marcjâtvieri. De sinergjie tra i doi ents regjonâi al nas il sproc “Semene la tô tiere, fâs cressi la tô culture” che si fasarà viodi su ogni bancut de vie, par rimarcâ cemût che la lenghe furlane e rapresenti une carateristiche culturâl uniche, preziose e di no podê meti in bande par relazionâsi e par promovi il teritori. Il furlan al jentrarà intal vîf de fieste e de convivialitât ancje midiant dai struments in linie. Al fevele za in marilenghe il sît internet de manifestazion, in graciis dal supuart dal servizi di traduzion par furlan metût a disposizion dal Comun di Udin di bande de ARLeF. Infin, propit inte zornade plui impuartante de manifestazion, la Agjenzie e à organizât un dopomisdì pardabon speciâl e dut dedicât ai fruts. Sabide ai 15 di Setembar si fasarà une grande fieste pai piçui, cun leturis animadis, ospits speciâi, zûcs, cusine, creativitât, premis e gadgets par ducj. E sarà dividude in doi events nassûts in colaborazion cul Comun, intal specific cu la Sezion Fruts de Biblioteche Civiche “V. Joppi”, e cul Ersa. Li de Sezion Fruts, in Riva Bartolini 3, des 14.30 aes 16.30, al sarà il moment di “Contis e zûcs par fruts Doc”, une fieste de editorie pai fruts in lenghe furlane che e previôt lis leturis animadis dai gnûfs libris de golaine di Free&Ulli, GjatUt, Fameis e Vielm il biel cul coinvolziment des cjasis editoris Futura Soc. Cooperative, Corvino Edizioni, Kappa Vu e Orto della Cultura. A tignî sù la fieste e saran Daria Miani, presentadore televisive une vore cognossude di “Maman!”, i zûcs a premis cun gadgets par ducj e doi personaçs tant amâts dai fruts: Free&Ulli dal vîf. Des 17.00 aes 18.30 si larà indevant cun “Mastercogo pai fruts di Maman!”, inte Aree pai fruts dal Ersa, in vie Matcjâtvieri. Apontament cun profums, savôrs, peraulis e cjançons: un laboratori ludic didatic che al previôt ancjemò la presince di Daria Miani, la condutore de trasmission televisive par fruts in lenghe furlane cetant preseade. La trasmission, realizade de ARLeF e in onde su Telefriuli, e tornarà a indalegrâ ogni setemane i piçui fans cul mês di Otubar. Ai fruts e ai gjenitôrs che a parteciparan al dopomisdì di fieste, la ARLeF ur regalarà gadgets e materiâi informatîfs che a mostrin i vantaçs de educazion plurilengâl. ARC/EP
Te foto: l'assessôr regjonâl Pierpaolo Roberti, cul president dal Consei regjonâl Piero Mauro Zanin e il diretôr de Arlef Willian Cisilino
Udin, 13 set - "Talian, furlan, todesc, sloven a son lis lenghis che a componin il Friûl Vignesie Julie che e je une regjon speciâl propit pes diversitâts che al cjape dentri. Pe aministrazion regjonâl al è duncje essenziâl promovi lis diversitâts, che no rivuardin dome la lenghe, ma ancje la storie, la culture, lis tradizions dai popui”.
Cussì l'assessôr regjonâl aes Autonomiis locâls, Pierpaolo Roberts, si è esprimût intervignint ae viertidure dai lavôrs dal Campus organizât de Rêt des minorancis di Europe (NPLD - Rêt to promote linguistic diversity), daûr de propueste de Agjenzie regionâl pe lenghe furlanis (Arlef) e cul patrocini de Fondazion Coppieters di Brussel, specializade in federalisim e linguistichis politichis.
Roberti al à rimarcât cemût che "i mieçs di comunicazion di masse a àn fat sparî lis lenghis minoritariis e i dialets: o vin di oponinus a chest declin e par chest il supuart de Regjon al sarà simpri, cu la atenzion necessarie a spindi al miôr lis risorsis, cence taiâ nuie e cence dispersions di bêçs publics in tancJ riui".
Inte difese des lenghis minoritariis, Roberti al à riclamât "il rûl fondamentâl des aministrazions comunâls che ur tocje la promozion de lenghe" e al à evidenziât il compit de Assemblee de comunitât linguistiche furlane, rapresentade al avigniment dal president Diego Navarria.
Par rinfuarçâ la incisivitât de azion dal guvier regjonâl, al à zontât ancjemò Roberti, la tutele des lenghis minoritariis e lis politichis sui coregjonâi tal forest a son stadis rimetudis al stes assessorât aes Autonomiis locâls. La tutele de lenghe furlane, di fat, "e passe ancje traviers i leams cui furlans tal forest che di agns a àn lassât chestis tieris, ma a continuin a coltivâ il furlan e lis tradizions".
Ae viertidure dal campus ospitât de Universitât di Udin a palaç Garzolini di Toppo Wassermann, a jerin presints ancje il president dal Consei regjonâl, Piero Mauro Zanin, il sindic di Udin, Pieri Fontanini, il vicepresident de NPLD Sabrina Rasom, il diretôr de Arlef, William Cisilino e Fabiana Fusco in rapresentance dal Ateneu furlan che al à colaborât ae organizazion dal apontament internazionâl cul supuart dal Centri interdipartimentâl pal disvilup de lenghe e de culture dal Friûl.
Il program dal campus si disnodarà fin a vinars cui intervents dai massims esperts di lenghis minoritariis che a provegnin di diviers ateneus europeans e la partecipazion di rapresentants dal Consei di Europe.
ARC/EP
Udin, ai 13 di Setembar – Al scomençe doman, joibe ai 13 di Setembar, il prin incuintri de Summer University dal Npld-Network to Promote Linguistic Diversity che si ten inte sede de Scuele Superiôr de Universitât di Udin a palaç Garzolini.
La sinergjie jenfri ARLeF- Agjenzie regjonâl de lenghe furlane e il Npld e puartarà in citât il prin incuintri dal Coppieters Campus: la iniziative e à vût, difat, il patrocini e il finanziament de Coppieters Foundation, specializade in federalisim e politichis linguistichis, e e viodarà la partecipazion di rapresentants dal Consei de Europe e di impuartants docents
e esperts a nivel mondiâl su lis politichis linguistichis.
ARC/EP
Udin, ai 9 di Avost - La capitâl de Frisie olandese, Leeuwarden, si vierç ae lenghe, ae musiche e ae culture furlane. Di fat, la “Capitâl europeane de culture 2018” dai 12 ai 19 di Avost e celebrarà la marilenghe, cuntune serie di iniziativis coordenadis de ARLeF -Agjenzie Regjonâl pe Lenghe Furlane.
Domenie ai 12 di Avost, tal dopomisdì, la “setemane furlane” e tacarà cuntune sorte di passaç dal testemoni tra furlans e asturians, che a jerin prime al centri de atenzion. In chê ocasion, a saran la musiche e il rap multilengâl di Dj Tubet a puartâ la vôs de ARLeF. La part plui uficiâl de setemane si inviarà la dì dopo cu la inaugurazion de mostre “Furlan, Lenghe de Europe”, curade dal diretôr de Agjenzie William Cisilino, e che e cjatarà acet intal Prinsentuin (zardin de citât), dentri dal paveon "Mem".
Dopo che e je stade viodude a Brussel, Teramo e in tantis localitâts regjonâls, la mostre - componude di 14 panei (cun tescj par furlan e par inglês) che a ilustrin la storie, la culture, la comunicazion e la politiche linguistiche metude in vore intal teritori furlanofon - e rive in Olande e e restarà vierte al public fin al tiermin de setemane. Pe sieradure, dopomisdì ai 19 di Avost, si darà ancjemò spazi ae musiche, cuntune gnove esibizion di Dj Tubet.
ARC/EP
Il governadôr dal Friûl Vignesie Julie Massimiliano Fedriga ae conference Osce a Udin sui rapuarts jenfri Stâts e mininorancis. Di çampe: l'ex president sloven Danilo Türk; l'Alt Commisari pes minorancis nazionâls Lamberto Zannier; il governadôr FVG Fedriga; Paolo Petiziol, president associazion Mitteleuropa e consol onorari de Cechie.
Udin ai 16 di Lui - "Autonomie e minorancis a son la fonde de ereditât dal lunc troi de specialitât dal Friûl Vignesie Julie e che vuê o sin clamâts a prudelâ, tal non di di une rilevance che no je dome culturâl e identitarie ma politiche. Ricognossi e tutelâ lis minorancis a son obietîfs che la Regjon e je in vore a puartâ indevant sedi cul Stât sedi sul plan des relazions internazionâls, a scomençâ di chês cui Paîs che nus stan dongje”.
Lu à sotlineât il governadôr dal Friûl Vignesie Julie Massimiliano Fedriga, vierzint la conference internazionâl sul teme dai rapuarts jenfri Stâts in materie di minorancis, inmaneade dal Alt comissariât su lis minorancis nazionâls de Organizazion su la sigurece e cooperazion in Europe (Osce) Lamberto Zannier.
Rispuindint ai gjornaliscj intune polse de session indulà che a àn partecipât plui di cent e vincj ambassadôrs e rappresentants dai 57 Paîs che a fasin part de Osce, Zannier al à invidât “l'Italie, che no à ancjemò ratificât la Cjarte europeane des lenghis regjonâls o minoritariis, a fâ un at concret par prudelâ il dirit des minorancis a mantignî vive la lôr culture”.
La Cjarte, vierte ae firme a Strasburc tal 1992, e je stade sotscrite de Italie ma no ancjemò ratificade dal Parlament.
ARC/EP
Udin ai 28 di Mai – Ai 13 e 14 di Setembar Udin e deventarà la capitâl des politichis linguistichis europeanis, parcè che e ospitarà un event dal Network des minorancis che al rapresente une ventine di guviârs regjonâls, statâls e europeans indulà che a son minorancis linguistichis. La decision e je stade dal Network a Valencia, su propueste de Arlef - Agjenzie regjonâl pe lenghe furlane. Une oportunitât impuartante pal Friûl Vignese Julie, al à fat savê il diretôr de Agjenzie, William Cisilino, parcè che si screarà chenti la Summer university che il network al à decidût di inviâ a scomençâ di chest an. ARC/EP
Foto senza didascalia
Udin, ai 15 di Mai – La nudride schirie di events e di manifestazions pe promozion dal patrimoni storic, lenghistic e artistic de Piçule Patrie inmaneade de cuinte edizion de “Setemane de culture furlane” e je jentrade tal vîf.
L’iniziative de Societât Filologjiche furlane e cjape dentri dai 10 ai 20 di Mai lis diviersis realtâts associativis de regjon, intune propueste culturâl organiche, cun chê di favorî la creazion di sinergjiis progjetuâls e operativis.
Ta cheste prospetive la Setemane di chest an e fronte il so percors di valorizazion e di promozion presentant moments di memorie, di studi, di ricercje sul teritori e su lis personis che lu àn onorât cul lavôr, la passion, il lôr jessi furlans: jenfri chestis, lis figuris di Gina Marpillero, Antonio Comelli, Alviero Negro, Alfeo Mizzau, Fabio Asquini, il Gard. Celso Costantini, Fermo Solari, Pierluigi Cappello.
Tra i apontaments di doman, si segnalalin chei tes scuelis - aes 9.00 il laboratoris di leture in lenghe furlane "Lis storiis di Free&Ulli, Gjat_ut e tantis sorpresis!" te scuele di Marsuris Disot (Paulêt); aes 11.00 lis leturis in lenghe furlane "Contis e fruts" te primarie di Felet (Tavagnà); aes 14.00 la presentazion te primarie di Tresesin “Olmis 2018-2019. 100 agns di Filologjiche” e la cunvigne “Fabio Asquini: un imprenditore illuminista nella Udine del '700” a palaç Mantica di Udin aes 16.
Programs tal detai sul sît www.setemane.it
ARC/EP
Udin, ai 7 di Avrîl – Une vore sior il program des celebrazions uficiâls de Fieste de Patrie dal Friûl che e sarà ospitade doman a Voleson Darzin a 941 agns de nassite dal Stât patriarcjâl furlan.
L'avigniment al tache des 10.30 con il corteu, acompagnât de bande de Societât filarmoniche Voleson, che al partirà de Cjase comunâl di Darzin par rivâ in place 73° Lombardia, dulà che e sarà esponude la bandiere dal Friûl. Aes 11.00 pre Daniele Rastelli, delegât dal vescul de diocesi di Concordia-Pordenone, e pre Italico Gerometta a concelebraran la messe par furlan te glesie di Sant Michêl cul acompagnament des corâls des parochiis di Darzin, Sant Laurinç e Sant Martin di Voleson. La cerimonie civîl si fasarà invezit a Voleson, tacant des 12.30, intal auditorium des scuelis “Erasmo di Valvasone”. Ae fin al sarà ancje premiât il vincidôr dal bant pe composizion dal imni uficiâl de Patrie dal Friûl.
Des 14.30, intal cjistiel, al larà in sene il spetacul teatrâl itinerant "Pachis e Patriis” par cure de "La compagnie dai Guitti". Ideât di pueste pe Fieste, il spetacul al conte i fats sucedûts la gnot di Sant Martin dal 1582 inte planure furlane. A son programadis cinc rapresentazions: aes 14.30, aes 15.15, aes 16.00, aes 16.45 e aes 17.30. Aes 15.30 e aes 17.00, intal domo di Voleson, a son programadis invezit lis visitis vuidadis al orghin dal 1533, acompagnadis di un conciert.
Des 11.30 aes 12.45 la fieste si podarà viodi in direte su Telefriuli (canâl 11) e in streaming sul sît www.telefriuli.it.
ARC/EP
Udin, ai 31 di Març - Dai 3 ai 7 di Avrîl, i Comuns di Voleson Darzin, Cjasarse e San Zorç da la Richinvelde a anticiparan la zornade de Fieste dai 8 di Avrîl cuntune setemane di iniziativis .
Martars ai 3 di Avrîl, aes 20.45, a Cjasarse, te sale consiliâr di Palaç Burovich de Zmajevich, si davuelzarà “Note di storia Patria. Serade di storie e di musiche furlanis” cun Pier Carlo Begotti, Paolo Forte, Emma Montanari e Flavio Bortuzzo. L’event si concludarà cuntun brindis cui tradizionâi “Colaçs”, i biscots de tradizion, spiegâts pe ocasion di Gabriele Pressacco, scritôr, storic e cogo furlan.
Miercus ai 4 di Avrîl, aes 20.45, a San Zorç da la Richinvelde, tal auditorium de biblioteche al sarà un incuintri di aprofondiment su la relazion tra il Patriarcje Bertant di Aquilee e i inteletuâi de epoche. Ae cunvigne, “Bertrando e l’Universitas Studiorum. Circolazione di intellettuali, libri e idee nella Patria del Friuli del XIV secolo”, a saran presints i relatôrs Angelo Floramo e Alberto Vidon.
Joibe ai 5 di Avrîl, aes 20.45, a Darzin, te Sale consiliâr de Cjase comunâl, al vignarà presentât il libri di Gianfranco Ellero e William Cisilino “Il Friuli in Europa. L’Europa in Friuli – Memorie di uno storiografo”, cu la presince dai doi autôrs.
Vinars ai 6 di Avrîl, aes 20.45 a Voleson, te Sale Roma dal Municipi al sarà proietât il docu-film di Massimo Garlatti-Costa “Missus. L’ultima battaglia”, che al conte la storie dai ultins predis di Glesie Furlane, e la lôr bataie cuotidiane par mantignî vive la lenghe furlane.
Sabide ai 7 di Avrîl, aes 17.30, a Cjasarse, te Sale consiliâr di Palaç Burovich de Zmajevich si davuelzarà la cunvigne “Dov’è la mia patria”. I relatôrs Angelo Floramo, Angela Felice, Giacomo Trevisan e Erika Adami a fasaran une riflession su la identitât e su lis sôs dinamichis intal Friûl dal III mileni, cuntun percors ideâl che al va di Pasolini fin ai nestris dîs.
Cun di plui, des 15.00 aes 17.00, in colaborazion cu la “Pro Loco Casarsa della Delizia”, si pues visitâ i lûcs di Pasolini a Cjasarse. Plui informazions su www.pasolinifriuli.it
Infin, sabide ai 7 di Avrîl, aes 20.45, a San Lurinç (Voleson Darzin), tes ex scuelis elementârs, si podarà viodi il spetacul teatrâl in lenghe furlane “Çurviei scjampâts”, dal Teatro Incerto.
ARC/EP
Udin, ai 30 di Març – Tal inovâl de costituzion dal Stât patriarcjâl furlan, ai 3 di Avrîl dal 1077, il Consei regjonâl e la Arlef - Agjenzie regjonâl pe lenghe furlane a presentaràn i ats de seconde Conference regjonâl su la atuazion de leç 29/2007 dedicade ae tutele, ae valorizazion e ae promozion de lenghe furlane, che si è tignude ai prins di Dicembar dal an passât.
La presentazion si tignarà martars che al ven a Udin, inte sale Pasolini de sede de Regjon, in vie Sabbadini, aes 11.00.
L’incuintri al sarà ocasion par presentâ ancje doi altris avigniments: il program des celebrazions uficiâls de edizion 2018 de Fieste de Patrie dal Friûl che si tignarà a Voleson Darzin domenie ai 8 di Avrîl e la ricercje universitarie vincidore dal bant 2017, promovude dal Consei regjonâl, pe assegnazion di une borse di studi e incentrade sul teme "L'ordenament juridic de Regjon Friûl Vignesie Julie, cun riferiment particolâr ai elements costitutîfs de specialitât regjonâl e al disvilup de stesse".
ARC/EP
Udin, ai 8 di Març - Domenie ai 11 di Març, aes 10, inte sede di Palaç Mantica a Udin, si da dongje la assemblee dai socis de Societât Filologjiche Furlane. L’incuintri si vierzarà cu la relazion dal president , Federico Vicario, che al presentarà i moments plui impuartants des iniziativis editoriâls, formativis, promozionâls e progjetuâls dal an passât.
Tra chestis, plui di cent a son stadis lis manifestazions cjapadis dentri de cuarte edizion de Setemane de culture furlane sui diviers aspiets de culture furlane, de storie al ambient, de leterature ae lenghe, de musiche a l’art, fin ae leture pai fruts.
La ativitât di didatiche e formazion e à viodût cors di lenghe e culture furlane tignûts in 22 comuns dal Friûl cu la poie de Arlef, là che a àn partecipât 500 corsiscj.
Te biblioteche sociâl di Palaç Mantica a van indenant lis voris di incressite e inzornament dai catalics: di resint al è stât donât, di bande de famee, il font dal musicist Luigi Garzoni, e al è stât cjapât dentri ancje il font “Duilio Durigon”, plen di edizions preziosis e di une impuartante racuelte di cjartis dal Friûl. Cun di plui, par merit de esperience za fate cu lis rivistis “Ce fastu?” e “Sot la Nape”, a son in vore la schedadure e la digjitalizazion, in zonte tal catalic internet de biblioteche, des rivistis furlanis plui impuartantis.
Simpri inte sede di Palaç Mantica si è rivâts ae scree dal Centri di documentazion, ricercje e sperimentazion didatiche, nassût di un protocol di intese cu la Arlef, che al è il pont di racuelte dai materiâi didatics produsût des scuelis e pont di incuintri e riferiment pai insegnants che a fasin ativitâts par furlan. Inte seconde part de assemblee e sarà la presentazion dal document di prevision pal 2018.
Ancje il gnûf an al sarà plen di iniziativis:pe Sff: dai 10 ai 20 di Mai si fasarà la cuarte edizion de Setemane de culture furlane – cun apontaments ancje a Rome e a Milan in colaborazion cui Fogolârs Furlans di lenti – che si sierarà cu la Fraie de Vierte a Budoie; il Congrès sociâl al è in program a Colorêt ai prins di Otubar.
ARC/EP
Udin, ai 3i di Zenâr - A son 172 lis lenghis dal mont za dopradis par gjeolocalizâ WordPress. Il program (gratuit) di progjetazion e di costruzion di sîts web plui cognossût e doprât, creât intal 2003, nol veve però la version par furlan. Cheste mancjance e je stade superade de ARLeF (Agjenzie Regjonâl pe Lenghe Furlane), cu la consulence di Ensoul srl di Fulvio Romanin. Il lavôr, cumò disponibil par ducj (a gratis), al à compuartât la traduzion di 6.287 frasis e plui di un an di lavôr, ancje parcè che, par otignî il risultât volût, a jerin domandadis competencis specifichis sedi linguistichis che tecnologjichis. Par altri, a son stâts localizâts in marilenghe dut il backend dal gjestionâl, i temis TwentySixteen e TwentySeventeen, il teme Rosetta e il plugin Qtranslate X. Di un pont di viste linguistic, cun di plui, al è stât sielt di mantignî in lenghe inglese origjinâl i tiermins za di ûs comun ("post", "tag") inte vite di ogni dì o chei che a saressin stâts dificii di voltâ. Il stîl di traduzion al à lât daûr des liniis vuide internazionâls, conservant il lengaç informâl dal backend di WordPress. Cu la version “furlane” di WordPress, si zonte al pacut di struments che cumò a son a disposizion dai utents un altri dispositîf che al semplificarà la realizazion di sîts internet in lenghe furlane. Facilitâ e incressi la presince dal furlan sul web al è un dai obietîfs strategjics dal PGJPL aprovât de Regjon, al à sclarît il president de Arlef. Sul sît de ARLeF, si puedin consultâ 3 gnûfs videotutorial fats de Agjenzie par ilustrâ intal detai ai utents l'ûs di ancjetancj struments utii par scrivi in maniere corete in lenghe furlane (intal specific il Grant Dizionari Bilengâl talian-furlan e la relative App, il Coretôr Ortografic e la Tastiere furlane semplice), che a durin 5-8 minûts ognidun, par furlan cui sottitui par talian. ARC/EP
