gnovis
Udini, ai 9 di Mai - E sarà la narative pai fruts la protagoniste dai apontaments de ARLeF - Agjenzie Regjonâl pe Lenghe Furlane, promovûts te ocasion de Setemane de culture furlane organizade de Societât Filologjiche Furlane dai 6 ai 16 di Mai.
Il prin apontament al è par martars ai 11, aes 16. Si fasarà on line e al sarà pussibil acedi ae direte dal sît www.setemane.it. Al tocjarà ae autore, Lussia Di Uanis (Lucia Pinat), insiemi cul president de ARLeF, Eros Cisilino, e cun Patrizia Geremia di Futura Edizioni, presentâ, in prime assolude, “Pierin Pieron e la strie Bistrie”, gnûf audiolibri de golaine Flabis Rock. Il progjet, tant che i precedents, al è caraterizât di une musiche (firmade di Ulisse Viezzoli e Magdalena Schmied) buine di cjapâ dentri grancj e picinins, di ilustrazions e grafiche une vore origjinâi, cuntun riclam clâr ae fase storiche che o vivìn: in dutis lis pagjinis, di fat, sul fonts al è presint un arc di sant Marc, il stes che al à acompagnât l’hashtag #andràtuttobene dilunc dal 2020. Pierin Pieron e la Strie Bistrie - di Futura Edizioni e finanziât de ARLeF – al è une des storiis dal repertori di tradizion orâl furlane e che e je stade sielte e publicade ancje di Italo Calvino intal libri “Fiabe Italiane” cul titul “Il bambino nel sacco”. In cheste version dal test di Lussia di Uanis, che lu à rielaborât e interpretât (cu la consulence linguistiche dal Sportel Regjonâl pe Lenghe Furlane de ARLeF), di là di vê fat lis ilustrazions, si vûl trasmeti un messaç impuartant: te stesse maniere che il protagonist al à rivât, cun inteligjence, a vinci la strie, cussì i letôrs a rivaran a domâ il Covid-19.
Miercus ai 12, aes 18, simpri on line su www.setemane.it, al sarà presentât invezit “La storie di Lolo il…”, un classic de leterature israeliane pai fruts che al conte di amicizie, fiducie e rispiet, cuntune trame semplice ma plene di impreviscj che i doi protagoniscj zovins a frontin cun fuarce e convinzion. Un volum publicât de cjase editore Forum, simpri cu la poie de Agjenzie Regjonâl pe Lenghe Furlane, che al à une carateristiche uniche: al è stât voltât dal origjinâl ebraic in furlan e no esist une version taliane, nol jere mai sucedût prime. La opare di Dvora Omer, une des scritoris israelianis plui impuartantis, e je stade voltade di Davide Turello, linguist e filolic de Universitât di Bamberg (Baviere), intant che a dâ vite ai personaçs cui dissens e je stade Pia Valentinis, vincidore de 21e edizion dal premi Andersen talian, tant che miôr ilustradore. A presentâ il libri al sarà simpri il president de ARLeF, Eros Cisilino, e cun lui il critic leterari Mario Turello adun cun Gabriele Zanello, docent di leterature furlane de
Universitât dal Friûl.
ARC/EP
Udin, ai 7 di Mai – Doman, sabide ai 8 di Mai, des 17.00 aes 19.00, tal curtîl dai Colonos di Vilecjace di Listize si tignarà un incuintri viert a ducj che ch’a intindin di partecipâ in maniere concrete a la racuelte di fonts, cu l’obietîf di difindi chest lûc simbolic ta la disponibilitât da l’associazion e di sigurâ un doman al progjet culturâl colonic ch’al è lât indevant par cuasit 30 agns. L’incuintri al darà vôs a lis manifestazions di afiet, di vicinance e di solidarietât concrete ch’a son rivadis tai dîs passâts da la bande di tantis personis e realtâts dal mont culturâl, artistic e sociâl dal Friûl.
Par solidarietât Danilo De Marco al metarà a disposizion cualchi sô fotografie.
ARC/EP
Udin, ai 7 di Mai - La ARLeF - Agjenzie Regjonâl pe Lenghe Furlane e clame dongje fantatis e fantats, cun mancul di 28 agns, che a vuelin deventâ YouTubers o che za lu son par selezionâ une scuadre di zovins che a vedin voie di contâsi al mont, di condividi lis lôr passions cui coetanis e di esprimi il lôr talent, par furlan, ma no dome.
Par chest progjet, di fat, la ARLeF e à in program di creâ un gnûf canâl dulà che lis fantatis e i fantats a puedin interagjî, condividi, informâ, imparâ, cjapâ ispirazion, ognidun cul so stîl personâl! A saran propit lôr, i YouTubers selezionâts, a sielzi i argoments di tratâ, lis modalitâts par fâlu, a dâ forme e struture a un “lûc” dut gnûf e che al cambie simpri.
Candidâsi al è sempliç. Dopo jessi jentrâts sul sît arlef.it, lant jù a bas fin a rivâ ae vôs "gnovis" al bastarà clicâ sul banner dedicât: “AAA si cirin YouTubers”. Dentri dai 12 di Mai, jentrant tal form (https://arlef.it/it/aaa-youtuber-cercasi/) si varà di inviâ la proprie video-presentazion curte (realizade ancje cul smartphone), contant la proprie passion e l’argoment che si volarès tratâ intal ambit dal gnûf canâl. Cui che al à za esperiencis tant che YouTuber al podarà indicâ ancje il leam al so canâl. Par sclariments dal câs, i candidâts a podaran inviâ un messaç di pueste eletroniche a info@sportelfurlan.eu o clamâ il 04321743400.
ARC/EP
Vosutis te sachete al è un progjet de Associazion musicâl "Bertrando di Aquileia"
Udin, ai 20 di Avrîl - "Il Ream dai Fruts", "Sacheburache", "Vosutis te sachete" a son trê gnûfs progjets destinâts ai fruts promovûts de Arlef-Agjenzie Regjonâl pe Lenghe Furlane par stimolâju a scoltâ, balâ e cjantâ par furlan.
I vincjesiet video a son disponibii di vuê sul canâl YouTube de Arlef, su la sezion "fruts" dal sît www.arlef.it e in curt ancje sul gnûf logât dedicât ai plui piçui www.ghiti.it. Intal câs di "Il Ream dai Fruts", a son stâts realizâts ancje dai dvd che a saran inviâts aes scuelis de infanzie e aes primariis, a supuart dal insegnament de lenghe furlane.
La ufierte, plurienâl, e je stade ilustrade vuê dal president de Arlef, Eros Cisilino, e dal diretôr, William Cisilino, in presince dal assessôr regjonâl aes Lenghis minoritariis, Pierpaolo Roberti.
Seont Roberti la presentazion dai progjets e cole propit dongje dôi avigniments impuartants pal futûr de lenghe furlane: il rinovament de Convenzion pai programs radiofonics e televisîfs Guvier-Rai e lis modificazions normativis par inzornâ la leç regjonâl di tutele (29/2007) che la Regjon e je daûr a lavorâ in dialic cun ducj i puartadôrs di interès.
"I videos a son dreçâts a un public tant zovin cun messaçs valoriâi e educatîfs e a rapresentin un strument di sigure utilitât - al à comentât Roberts - pe difusion dal furlan sedi intes fameis che inte scuele. Si trate ancje di materiâi audiovisîfs prodots cun cualitât e professionalitât des associazions, coordenadis di Arlef, che a podaran rapresentâ pal servizi public une ocasion impuartante par implementâ la ufierte di programs in lenghe furlane".
Roberti al à rinovât l'impegn de Regjon a riclamâ al Guvier l'obietîf di cressi organic e oris di programazion dedicadis ai programs radiofonics e televisîfs in furlan e soredut di otignî ancje risorsis e personâl pe ufierte informative.
"Al è un dirit e la Aministrazion regjonâl e continue a ricuardâlu in chest moment decisîf là che a son in riscriture i acuardis: l'obietîf nol è, dal rest, dome chel de programazion, ma ancje chel di une informazion che in furlan tu si ocupi a 360 grâts de atualitât. Al è un obietîf di otignî cun pragmatisim e gradualitât, ma se no viodarìn pas indenant inte convezion prossime - al à sigurât Roberti - la Aministrazion si metarà di traviers".
A ilustrâ i trê progjets i ideadôrs e curadôrs Elisabetta Ursella par Belka Medie, Michela Franceschina pe associazion Bertrando di Aquileia e Alberto Zeppieri par Numar Un.
"Sacheburache" (Belka Medie) al à selezionât filastrocjis de tradizion orâl, proponintlis ancje intune version origjinâl rap. I prins 8 video a son stâts zirâts cuasi in maniere esclusive
al viert: Martina Zamaro e introdûs prime la musiciste Nicole Coceancig cu la version tradizionâl des filastrocjis e po al jentre in cjamp Dj Tubet.
"Vosutis te sachete" al presente des cjançons ineditis in marilenghe, modernis e apassionantis, cjantadis e baladis da fruts stes. Si trate di 7 videos fats ancje par vie de lungje esperience de associazion intal setôr de educazion musicâl intes scuelis primariis.
"Il Ream dai Fruts" (Numar Un) e je la version in lenghe furlane dal formât argjentin "El colpevulut infantîl", cu la traduzion des cjançons e l'adatament dai personaçs al contest furlan. Intai videos tantis vôs cognossudis ancje al grant public che tra chel Bobby Dome, la cjantante slovene Tinkara, Botonadis Cumins Tonazzi, Silvia Michelotti, Julie Daici.
ARC/EP
L'assessôr regjonâl Pierpaolo Roberti
Udin, ai 13 di Avrîl – “La Regjon e je pronte a sostignî cualsisedi ativitât si puedi meti in cjamp in chescj vincj dîs che nus separin de scjadince naturâl de Convenzion pe trasmission di programs radiofonics in lenghe furlane jenfri la Presidence dal Consei e la Rai par centrâ l'obietîf di podê fâ cualchi pas in plui a pet di cetant che al è za ipotizât ital stampon che o sin in spiete”.
Lu à sigurât l’assessôr regjonâl aes Lenghis minoritariis Pierpaolo Roberti, marcant la oportunitât di continuâ la azion sinergjiche di domande di implementazion des risorsis tecnologjichis e umanis in marilenghe te sede Rai dal Friûl Vignesie Julie “ancje traviers la spedizion di une letare direte al sotsegretari ae Informazion e Editorie Giuseppe Moles”.
Roberti al è intervignût ae presentazion dai ats de cunvigne organizade ai 13 di Avrîl passât “La ufierte radiotelevisive pes minorancis linguistichis in Italie” de Assemblee de comunitât linguistiche furlane (Aclif). Cumò la stampe e vignarà distribuide ae Zonte e al Consei regjonâi, ai vertiçs de Rai, a rapresentants istituzionâi.
Roberti al à dit graciis al president de Aclif, Markus Maurmair, parcè che sedi la organizazion de cunvigne, sedi la stampe e difusion dai ats, ma ancje la ultime iniziative presentade vuê e promovude de Assemblee, ven a stâi doi “camion vele” che a difondaran sul teritori il messaç “Plui Friûl in Rai”, a rapresentin un supuart fondamentâl ae azion di pression sul Guvier e la Rai che la Aministrazion regjonâl no à mai fat mancjâ.
Di bande sô il diretôr de sede Rai dal Friûl Vignesie Julie, Guido Corso, al à sotlineât che l'an passât, in graciis di un sfuarç corâl, si è rivât insom a un travuart impuartant. “L'acuardi integratîf intun an di pandemie nol jere un risultât sigûr. O crôt che Presidence dal Consei e Rai a vedin di prestâ atenzion a chestis manifestazions, risultât di une pression costante di dutis lis istituzions, puartadis indenant in mût trasversâl. Chel che al è stât fat fin cumò de sede dal FVJ o calcoli al sedi stât un sfuarç impuartant: o sin rivâts a meti in onde dai programs origjinâi e cun grande atenzion ae cualitât. No o volìn che la programazion des lenghis minoritariis dal teritori sedi 'folcloristiche', ma che e vedi impuartance culturâl, e o desiderìn che la Rai e resti in dialic cu lis istituzions culturâls dal teritori”.
“Al è un probleme di cuantitât di oris di trasmission, ma ancje di cualitât", al à sotlineât Fidrì Vicjari, president de Furlane Filologjiche, intant che il president de Arlef, Eros Cisilino, al à rilevât la dibisugne di rivâ a un plui impuartant risultât a pet di ce che al è stât otignût fin cumò in tiermins di infuartiment dal personâl, autôrs di programs e gjornaliscj, daspò 25 agns di spiete.
ARC/EP
Udin, ai 25 di Març - Ancje pal 2021 il Centri interdipartimentâl pal svilup de lenghe e de culture dal Friûl (CIRF) de Universitât dal Friûl al torne a proponi i siei cors gratuits di lenghe furlane indreçâts ai dipendents de aministrazion publiche e inmaneâts in gracie dai fonts de leç 482 dai 15 di Dicembar dal 1999, pe tutele des “minorancis linguistichis storichis”. Pe session de Vierte a son in program doi cors, un di nivel di fonde, dai 22 di Març ai 26 di Avrîl, e un di nivel intermedi, dai 3 di Mai ai 3 di Jugn.
Ducj i doi i cors a son dividûts in 10 incuintris, che si davuelzaran su la plateforme informatiche “Microsoft Teams”, tai dopomisdîs di lunis e di miercus (fale che l’ultin apontament dal cors di nivel intermedi, che si fasarà di joibe), des 2 e mieze aes 5 e mieze. Ae fin dal percors formatîf al è previodût un esam, di mût di stazâ lis competencis cjapadis sù. Ai corsiscj che a passaran la prove finâl e che a varan frecuentât almancul l’80% des oris ur vignarà dât un atestât di frecuence.
Par vê altris informazions e par notâsi si pues contatâ la segretarie organizative dal CIRF al numar 0432 556480 o pûr mandâ un messaç di pueste eletroniche a cirf@uniud.it (segretarie dal CIRF) o ben a sportel.furlan@uniud.it. Si pues discjamâ il modul di iscrizion dal sît http://cirf.uniud.it.
Intai agns, la iniziative si è dimostrade un strument zovevul par chei che a lavorin intun Ent Public tal teritori furlanofon e che a àn voie di insiorâ lis lôr competencis e di miorâ tal stes timp ancje il contat cui utents. Cun di plui, si metin in vore ancje lis indicazions de Leç 482/1999 e de L. R. 29/2007, che a previodin che si dopri la lenghe furlane intai Ents Publics e intes societâts di servizis ae popolazion.
ARC/EP
Udin, ai 12 di Març – E je in program doman, sabide ai 13 di Març aes 10.30 (direte Facebook @aclifit) la cunvigne su lis trasmissions RAI in furlan. La iniziative organizade de ACLiF, Assemblee de Comunitât Linguistiche Furlane, e à metût adun di fat gnovis adesions di rilêf. Ae liste za impuartante di ospits, si zontin ancje il diretôr de sede RAI de Val di Aoste Severino Zampaglione e il president di Confindustrie radio television Francesc Siddi, za conseîr di aministrazion de RAI e component dal Corerat de Sardegne.
Il futûr de programazion RAI in Friûl, basât suntune convenzion che e varà di jessi riviodude e rinovade fra pôc plui di 50 dîs, al interesse di fat in maniere speculâr ancje chês altris minorancis linguistichis, soredut chê francese e patois de Val di Aoste, che la sô convenzion e je pûr prossime ae scjadince. Ma l'interès al è alt ancje pai sarts e i ladins, tant che par todescs e slovens. Il Friûl al podarès in cualchi mût deventâ une sorte di laboratori sperimentâl par une gnove impostazion de ativitât radiotelevisive. Par altri ae cunvigne a saran presints propri i doi protagonicj che in concret a varan di meti a pont la gnove convenzion: il cjâf dal dipartiment editorie Sepe, che al rapresente il Guvier, e il dirigjent de RAI Luppi.
La cunvigne che e sarà moderade dal president ACLiF Markus Maurmair e de conseire Ornella Comuzzo, e viôt la partecipazion di gjornaliscj e dirigjents RAI des variis parts di Italie. Di là dai za nomenâts Zampaglione (Val di Aoste) e Sepe (Sardegne), a intervignaran il diretôr de sede RAI di Triest Guido Corso, la responsabile de struture programs in lenghe slovene Martina Repinc, il diretôr de sede RAI di Bolzan Vittorio Longati e il prin redatôr dal Tg in lenghe ladine Stefan Pescollderungg. I vertiçs RAI a saran presints cul diretôr des Relazions istituzionâls Stefano Luppi, intant che la vôs dal Stât e sarà puartade di Ferruccio Sepe, cjâf Dipartiment pe informazion e la editorie de Presidence dal Consei dai Ministris. Pe part tecniche, a intervignaran il vicepresident dal Corecom FVJ Antonella Eloisa Gatta e il diretôr de ARLeF William Cisilino; intant che pe part politiche a intervignaran il president dal Consei regjonâl Piero Mauro Zanin, l'assessôr regjonâl Pierpaolo Roberti e il coleghe de Val di Aoste assessôr Luciano Caveri.
L'avigniment, patrocinât di RAI, Regjon Friûl Vignesie Julie, ARLeF e Societât Filologjiche Furlane, cu la colaborazion dal Corecom, al sarà mandât in direte streaming.
La videoconference e podarà jessi viodude in direte su Facebook @aclifit, su Instagram Aclif e su Youtube, traviers i sîts internet www.aclif.it, www.arlef.it, www.filologjichefurlane.it, o in maniere direte de URL https://www.youtube.com/channel/UCixEGfu-cjORCkWfOj7LPnw.
ARC/EP
Udin, ai 25 di Fevrâr - E je daûr a tacâ la consegne des bandieris dal Friûl ai Comuns furlans che lis àn domandadis. La iniziative promovude de Agjenzie Regjonâl pe Lenghe Furlane - ARLeF e à vût un bon acet di bande des aministrazions locâls che cussì, in ocasion dai 3 di Avrîl, zornade des celebrazions pe Fieste de Patrie dal Friûl, a podaran vistî di fieste i lôr comuns.
La Agjenzie Regjonâl pe Lenghe Furlane, intai mês passâts, e à cjapât contat cun ducj i comuns furlans, metintsi a lôr disposizion pe distribuzion dal standart – ricognossût in maniere uficiâl cuntune leç regjonâl.
“La rispueste dai sindics e je stade une vore positive – al à marcât il president de ARLeF, Eros Cisilino -. La machine organizative e je za in vore di un pôc di timp e in curt o scomençarìn cu la distribuzion, che e finirà in timp par podê celebrâ ducj insiemi il 3 di Avrîl, piturant di celest e zâl i lûcs simbul de Patrie”.
La bandiere dal Friûl e je il setim vessil plui antîc in Europe (1334). La origjin de bandiere dal Friûl e rimonte ai timps dal principât dai Patriarcjis di Aquilee, clamât ancje Patrie dal Friûl o Stât patriarcjâl furlan, un stât sovran che dal 1077 al 1420 al guviernà il Friûl e, in moments alternis, ancje altris teritoris. L’esemplâr plui innomenât e antîc de bandiere patriarcjâl al è esponût intal Museu dal Domo di Udin.
La iniziative de ARLeF e rive un an dopo de fieste “virtuâl” dal 2020.
“Chê passade e je stade une fieste divierse dal solit – al à sclarît Cisilino -, ma che nus à fat viodi dute la passion straordenarie, il sintiment di union e di identitât dai furlans”.
Ancje se tal rispiet de campagne di distanziament sociâl #joorestiacjase, necessarie par vie dal moment che si sin cjatâts a vivi, pardabon in tancj a àn rispuindût ae iniziative de ARLeF. Cussì, a son stadis passe 500 lis fotografiis di bandieris rivadis ae Agjenzie di ogni cjanton dal Friûl, ma ancje di bande di furlans fûr de regjon o dal forest.
ARC/EP
Udin, ai 23 di Fevrâr - La Agjenzie Regjonâl pe Lenghe Furlane - ARLeF e sostignarà, cun 25 mil euros in totâl, i ents locâi che a vuelin realizâ events colaterâi ae Fieste de Patrie dal Friûl. Rivade ae edizion numar 44, la fieste e cole ai 3 di Avrîl e e ricuarde la date di costituzion dal Stât patriarcjâl furlan intal 1077. Chest an l’event principâl si davuelzarà ai 11 di Avrîl e al varà tant che sede principâl Udin.
A podaran acedi ai fonts i ents cun sede legâl intai teritori des ex provinciis di Gurize, Pordenon e Udin, e – pe prime volte – ancje i Comuns furlans dal Venit (Cint, Concuardie, Fossalte, Gruâr, Puart, San Michêl dal Tiliment, Tei) in graciis di un acuardi tra lis Regjons Friûl-V.J. e Venit dai 17 di Setembar stâts.
Daûr di ce che al previôt il bant, disponibil su www.arlef.it te sezion “Bants, garis e avîs 2021”, a saran finanziadis lis ativitâts che a vuelin valorizâ lis origjins, la culture e la storie di autonomie dal popul furlan. In particolâr: events di cualitât, di realizâ online, che a rivin a fâ partecipâ soredut lis gjenerazions plui zovinis e che a sedin indreçâts a fâ cognossi e/o aprofondî la lenghe, la storie e la culture furlane; ma ancje stampe e difusion di publicazions che a vedin il stes obietîf; infin realizazion e instalazion di lastris, targhis o insegnis turistichis cul fin di memoreâ personalitâts che a àn contribuît in maniere impuartante ae conservazion e al disvilup de identitât furlane.
Lis ativitâts culturâls a podaran jessi realizadis di un ent locâl singul o pûr di agregazions. Lis domandis a varan di rivâ, dentri dai 8 di Març dal 2021, dome midiant di PEC ae direzion: arlef@certgov.fvg.it.
Par dutis lis informazions sul al bant, si pues telefonâ al 0432 555910, o scrivi a: federica.delpino@regione.fvg.it.
ARC/EP
Foto senza didascalia
Udin, ai 15 di Zenâr - Al è timp fin ai 25 di Zenâr dal 2021 pe sielte dal insegnament de lenghe furlane par l’an scolastic 2021/2022 che si fâs tal moment de iscrizion al prin an
de scuele de infanzie, de primarie e de secondarie di prin grât (in linie, sul portâl dal MIUR o ben li de segretarie de scuele) e che reste valide par dut il cicli scolastic.
La Agjenzie regionâl pe lenghe furlane e ricuarde che fâ cressi i fruts plurilengâi al è un tra i regâi plui preziôs che si puedi fâur. In Friûl, ancje a scuele, ducj i fruts
a àn la pussibilitât di fâlu in mût naturâl. I vantaçs cognitîfs, sociâi e culturâi di une educazion plurilengâl a son cetancj: par esempli, imparâ il furlan a scuele
al à efiets positîfs sul aprendiment di altris lenghis. Nol è un câs, se ancje l’an scolastic passât, inte scuele de infanzie e inte primarie, passe il 76% dai gjenitôrs al à dit di sì al furlan a scuele.
ARC/EP
Il poster pes scuelis de ARLeF
Udin, ai 15 di Dicembar - Il progjet educatîf ”Free&Ulli e lis besteatis” – metût adun de ARLeF cu la colaborazion de Protezion Civîl – al cres ancjemò e al rive intes scuelis furlanis. Dopo dal carton animât (mandât fûr sui socials e a disposizion sul canâl YouTube de ARLeF) e de schede a fumets (dade fûr intai tai centris estîfs comunâi), cumò e je la volte di un poster, che propit in chescj dîs al è stât mandât a dutis lis scuelis primariis e de infanzie, par che al sedi picjât in ogni aule e intai coridôrs dai istitûts. E cussì, lant daûr dal esempli dal crot Free e de moscje Ulli, che si lavin lis mans su la ande de innomenade naine Ursule parussule, i fruts a impararan cemût parâ vie lis “besteatis” in maniere sigure e simpatiche.
“O vin volût meti il poster a disposizion di dutis lis classis dal teritori di lenghe furlane – al sclarìs il president de ARLeF, Eros Cisilino – sigûrs che, une volte picjât inte aule e cu la colaborazion dai insegnants, al deventarà un bon supuart ludic e didatic pe educazion ae salût dai plui piçui. O vin vût za tantis rispuestis positivis a cheste campagne di educazion, parcè che e je un bon imprest par usâ i fruts a compuartaments corets. La promozion de salût par mieç de lenghe furlane e je un des ativitâts specifichis metudis in vore de ARLeF dal principi de emergjence sanitarie, in colaborazion strente cu la Protezion Civîl e cu la Direzion Salût de Regjon”.
Free & Ulli - che i fruts a àn imparât a cognossi ancje par vie de trasmission televisive “Maman!” (in onde ogni vinars aes 18.30 su Telefriuli) - a nassin de fantasie de ilustradore Patrizia Geremia e a son i protagoniscj des storiis di une golaine di libris publicade de Futura Edizioni di San Vît dal Tiliment.
ARC/EP
Il cd dal Côr polifonic di Rude
Udin, ai 9 di Dicembar - A 75 agns de sô nassite, il Côr Polifonic di Rude al publiche il so Cd numar disesiet, che al è dut dedicât ae vilote furlane, il gjenar musicâl origjinâl e popolâr che e à vût un rûl impuartant pal svilup dal cjant corâl dal Friûl. Il titul al è Nûfcent furlan. Musichis su temis popolârs di un Friûl che nol è plui, e al è un “viaç inte memorie” in 21 tocs regjistrâts dal vîf. Il cd al è stât presentât intune conference stampe là che a àn partecipât Eros Cisilino, president de ARLeF, Pierpaolo Roberti, assessôr regjonâl aes Lenghis minoritariis, Pier Paolo Gratton, responsabil des relazions esternis de corâl e il musicolic Alessio Screm.
«Cu la publicazion dal cd Nûfcent furlan, il Polifonic di Rude al è rivât a jemplâ il vueit di rapresentazions in presince, events e ativitâts che ducj i côrs a àn patît par vie de pandemie - al à comentât l’assessôr Roberti -. Midiant de promozion e de difusion di un gjenar di culture e musiche cussì particolâr tant che la vilote, al sarà ancje pussibil dâi fuarce ae identitât, che e passe pe riscuvierte e pe cognossince de sô lenghe e de sô storie, ancje par stiçâ lis gjenerazions dai plui zovins che a podaran lâ insot di temis essenziâi dal Nûfcent furlan e dâ linfe aes lôr lidrîs. L’auguri – al siere Roberti – al è che a regalâ chest cd par Nadâl si rivi a trasmeti un sens fuart di popul in graciis de riscuvierte dal so patrimoni di musiche popolâr».
La ARLeF e à sostignût il progjet “voltant e adatant i tescj antîcs e modernis dal libret, intal rispiet de grafie uficiâl de lenghe furlane e de variantis locâls. Dongje dai tescj par furlan si viodin ancje chei par talian e par inglês, cu la intenzion di dâ une dimension europeane e internazionâl ae cognossince des vilotis, un patrimoni culturâl tipic dal Friûl che al à origjins popolârs intal secul XV”.
Il Cd presentât vuê, che in mût significatîf al mostre il famôs cuadri di Zigaina “Assemblee di bracents sul Cormôr” su la sô cuvierte, al è il risultât di un progjet nassût tal 2002 e che il Polifonic di Rude al à volût publicâ in chescj mês di confinament, par testemoneâ il desideri di dut il mont corâl di tornâ a tacâ a cjantâ e di tornâ a proponisi daspò di tant timp. Tant che comentadôr e vuide de publicazion discografiche al è intervignût l'espert di musiche furlane Alessio Screm, che al à presentât esemplis audio e imagjins di storie antighe e moderne de vilote, sedi anonime che di autôr.
Il progjet al nasseve de dibisugne di proponi la musiche furlane in maniere divierse: par chest al jere stât contatât il scritôr Alberto Garlini, che al veve scrit une “storie” di emigrazion, amôrs, passions e vueris, invezit la incarghe de direzion e je dal mestri Daniele Zanettovich. A son stâts fats cinc concierts in regjon – cun Sebastiano Zorza ae armoniche, Giorgio Fritsch aes percussions, Eddi Bortolussi tant che vôs recitante e cun dongje un grup feminin costituît pe ocasion – otignint un sucès grant de critiche e di public.
Di cumò si podarà tornâ a scoltâ chel lavôr no dome par un recupar de memorie, ma par cjalâ indenant e par fermâ il fat che lis lidrîs dal Polifonic a son simpri ben plantadis tal patrimoni musicâl locâl.
ARC/EP
William Cisilino
Udin, ai 7 di Dicembar - La ARLeF - Agjenzie regjonâl pe lenghe furlane e jentre tal diretîf de NPLD, la Rêt europeane des minorancis linguistichis cun sede a Brussel. E je la prime volte che la comunitât linguistiche furlane e à une incarghe di nivel european intune organizazion pe tutele des lenghis minoritariis. A rapresentâ la ARLeF al sarà il so diretôr, William Cisilino, tant che vicepresident, dongje de gnove presidente dal organisim, Agustina Vilaret González, segretarie gjenerâl pe politiche linguistiche dal guvier des Isulis Baleârs (Spagne). La siore Vilaret e à cjapât il puest di Sietske Poepjes, rapresentante de Provincie autonome de Frisie (Paîs Bas). Sedi Cisilino che Vilaret a son stâts votâts ae unanimitât dai membris de NPLD par tignî il tamon de rêt intai prossims trê agns.
La NPLD e je une rêt paneuropeane ative intal setôr de politiche e de planificazion linguistiche increditade li des principâls istituzions europeanis tant che la Comission Europeane, il Parlament European e il Consei di Europe. Diviers organisims statâi e regjonâi che a rapresentin Irlande, Catalogne, Paîs Basc, Gales, Corsiche e Bretagne a son i sogjets membris di cheste rêt internazionâl, in plui di universitâts, associazions e organizazions no governativis che a son ativis intal setôr dal multilinguisim. La Regjon Autonome Friûl - Vignesie Julie, midiant dal Consei regjonâl e de ARLeF, e fâs part de Rêt dal 2014.
L'obietîf primari de NPLD al è chel di incressi, a nivel european, la cussience in cont de impuartance de diversitât linguistiche, dant fuarce a chest principi tant che oportunitât e strument di fonde pal disvilup personâl, sociâl e economic de Europe e dai siei citadins, in plui che ocasion par sburtâ il dialic interculturâl tra i europeans.
ARC/EP
Udin, ai 14 di Otubar - “Il Libri di Maman!” al è il gnûf prodot editoriâl realizât de Agjenzie Regjonâl pe Lenghe Furlane che, in graciis de colaborazion sinergjiche cul Ufici Scolastic Regjonâl dal Friûl Vignesie Julie, al è cumò a disposizion di ducj i students des scuelis primariis dal teritori furlanofon. Il progjet al è stât presentât in ocasion di une conference stampe là che a àn partecipât l’assessôr aes Lenghis minoritariis, Pierpaolo Roberti, il president de ARLeF, Eros Cisilino e la referente pe lenghe furlane dal Ufici Scolastic Regjonâl, Paola Cencini.
Juste in chescj dîs a son stadis dadis fûr dutis lis 20.000 copiis ai 180 istitûts scolastics des ex provinciis di Udin, Pordenon e Gurize. Doi volums diferents par fasse di etât: il prin al è stât pensât pai arlêfs des classis 1e e 2e, il secont pes classis 3e, 4e e 5e. In gracie dai materiâi che si cjatin dentri – zûcs, contis, proverbis, curiositâts, ricetis, lavoruts, tescj di leterature e conseis di leture – i libris si podaran doprâ tes ativitâts didatichis e in chês di grup, par compagnâ i fruts te discuvierte di peraulis gnovis e di gnûfs sunôrs, clamantju a doprâ la lenghe furlane in maniere ative.
“Il Libri di Maman!” al è pensât par dâ a insegnants e students un supuart util par imparâ il furlan midiant dal zûc, dal divertiment e de creativitât – al marche il president de ARLeF, Eros Cisilino -. I dâts dal an scolastic 2019/2020 a metin in evidence che il 76% dai gjenitôrs al à sielzude la opzion dal furlan intal moment de iscrizion dai fîs te scuele de infanzie e in chê primarie. Une percentuâl cressude intai ultins agns, che e mostre ben cemût che lis fameis de nestre regjon a sedin simpri plui cussientis dai tancj vantaçs, cognitîfs e sociâi, che al da il plurilinguisim, come che a dimostrin lis ricercjis sientifichis plui avanzadis. I volums che o vin dât fûr ai students in sinergjie cul Ufici Scolastic Regjonâl, pe ARLeF a son dome il prin pas par garantî ae scuele un materiâl di cualitât pe educazion plurilengâl par furlan. O ringracii la diretore, Daniela Beltrame, pe colaborazion produtive.”
“Il Libri di Maman!” al nas de esperience di un progjet plui grant de ARLeF che al cjape dentri ancje la trasmission televisive omonime, la prime in lenghe furlane dedicade ai fruts, e “La pagjine di Maman!”, rubriche setemanâl su cjarte, siore di zûcs e di spazis pai plui piçui. I contignûts dai doi volums a son stâts curâts di Daria Miani, condutore de trasmission tv, cul supuart dal Sportel Regjonâl pe Lenghe Furlane de ARLeF. La sielte didatiche dai materiâi di ogni volum e je stade curade des insegnantis Enza Purino e Laura Urtamonti. Lis ilustrazions dai protagoniscj a son di Serena Debegnach e di Alessia Battistutta.
Altris copiis di “Il Libri di Maman!” a son a disposizion dai insegnants di lenghe furlane e si puedin ritirâ tal Ufici VI Ambit Teritoriâl pe provincie di Udin cun sede in viâl Armando Diaz 60, dopo vê fate domande a cheste direzion di pueste eletroniche parfurlan@gmail.com
ARC/EP
Udin, ai 11 di Setembar - In ocasion dai 150 agns de muart dal grant concitadin, Jacopo Pirona, la ARLeF (Agjenzie Regjonâl pe Lenghe Furlane), la Regjon Friûl Vignesie Julie e il Comun di Dignan a àn prontât une schirie di iniziativis par memoreâ chest grant om de culture che al è nassût in chest paîs intal 1789. Cualchi iniziative e je za inviade, altris i vignaran daûr vie pai ultins mês di chest an e intai prins dal 2021.
La plui resinte e je peade a la cartelonistiche stradâl gnove. Cun di fat, intes cuatri stradis di acès al cjâf lûc dal Comun e je stade zontade une tabele che e marche la impuartance di chest pe comunitât di Dignan. Ae presince dal assessôr regjonâl aes lenghis minoritariis e il president de ARLeF a son stadis screadis lis targhis che a ricuardin cemût che Dignan al sedi il “Paîs di Jacopo Pirona, autôr dal prin vocabolari de lenghe furlane”.
Al fo propit l’abât Jacopo Pirona a completâ la prime version, publicade dopo de sô muart (intal 1871), di un vocabolari pal furlan. Insegnant des scuelis publichis, scritôr e linguist di fin, Pirona al jere in rapuarts di amicizie e stime cui plui innomenâts personaçs furlans dai siei timps, fra chescj: Prospero Antonini, Pieri Çorut, Gabriele Pecile e Pacifico Valussi. La sô rêt di cognossincis e lave, dut câs, ancje fûr dai confins furlans, tocjant ancje cualchidun dai studiôs talians e forescj plui cualificâts di cetantis dissiplinis. La prime edizion dal vocabolari (“capitale monumento della nostra parlata locale”) al fo completât cul jutori dal nevôt Giulio Andrea (ancje lui nassût a Dignan) e stampât a Vignesie. Cualchi an plui tart, il stes nevôt, adun cun Ercole Carletti e Giovanni Battista Corgnali, a publicarin “Il nuovo Pirona” (a Udin, intal 1935). I rescj di vîf di Jacopo Pirona (muart intal 1870), a polsin intal cimitieri monumentâl di Udin. ARC/EP
Udin, ai 13 di Lui - L’imni dal Friûl “Incuintri al doman”, presentât de ARLeF-Agjenzie Regjonâl pe Lenghe Furlane e dal Istitût Ladin Furlan “Pre Checo Placerean” in ocasion de Fieste de Patrie dal Friûl intal Avrîl dal 2020 al à vût, te interpretazion des artistis di ArteVoce Ensemble, un grant sucès cun passe 120 mil visualizazions intal mont e cetantis condivisions sui social.
Cheste difusion straordenarie e à vût tant che protagonistis la diretore artistiche dal grup, Franca Drioli e lis cuatri interpretis, Consuelo Avoledo, Michela Franceschina, Jessica Interdonato e Giulia Polidori. A dutis lis artistis cjapadis dentri intal progjet, la Agjenzie e à volût esprimi il so preseament consegnant une targhe personalizade “pe passion, pe cure e pe interpretazion” che a àn contribuît a fâ dal Imni une bandiere gnove e vere dal Friûl e dal cjant in lenghe furlane.
Pe consegne dai ricognossiments a jerin presints il president de ARLeF, Eros Cisilino, e il diretôr de Agjenzie, William Cisilino.
Il videoclip al dure 2 minûts cirche. Lis peraulis dal Imni a son di Renato Stroili Gurisatti, invezit lis musichis origjinâls a son dal innomenât compositôr furlan Valter Sivilotti, che a son stadis rangjadis pe ocasion dal musicist Geremy Seravalle. La direzion artistiche de esecuzion musicâl dal cuartet ArteVoce Ensemble e je di Franca Drioli di ArteVoce Voice&Stage Academy. La regjie dal video, realizât di Quasar Corporate, e je di Giorgio Milocco. Lis ripresis in studi a son stadis fatis intai BlackMirror Studios di Udin.
ARC/EP
Udin, ai 5 di Jugn - La manifestazion de Fieste de Patrie dal Friûl dal 2020, programade a Udin in Avrîl e dopo rimandade ai 7 di Jugn par vie de emergjence sanitarie, si torne a rimandâ in maniere definitive al 2021. Lu à decidût la ARLeF – Agjenzie Regjonâl pe Lenghe Furlane – in acuardi cu la Regjon e cul Comun di Udin.
Domenie ai 7 di Jugn la capitâl furlane e veve di ospitâ, intal Salon dal Parlament, la celebrazion plui impuartante che cumò e ven rimandade a Avrîl dal prossim an. La pandemie e à lassât lis sôs codis e, duncje, no son ancjemò lis cundizions di sigurece sanitarie par podê inmaneâ cu la trancuilitât juste l'avigniment principâl e lis tantis iniziativis culturâls programadis a Udin pe ricorence.
In ogni câs, la Agjenzie e il Comun a previodin di organizâ un moment memoreatîf dedicât ae Patrie dal Friûl intal periodi estîf. I Comuns furlans che a vevin programât manifestazions colaterâls ae Fieste a podaran organizâlis dentri de fin dal an.
ARC/EP
Udin, ai 24 di Mai - La ARLeF - Agjenzie Regjonâl pe Lenghe Furlane - e à dât fûr gnûfs bants pe promozion de lenghe furlane intai setôrs de editorie, de ricercje sientifiche e dal spetacul. Lis cifris metudis a disposizion par chescj ambits intal 2020 a son: 78 mil euros, 75 mil euros e 45 mil euros, par un totâl di 198 mil euros (18 mil euros in plui rispiet al trieni precedent).
Pe editorie, a son previodûts finanziaments par promovi la lenghe furlane fra lis gjenerazions zovinis sui gnûfs mieçs di comunicazion (35 mil euros); par promovi audiovisîfs di cualitât in lenghe furlane pai fruts, fats di produtôrs indipendents (28 mil euros); par promovi la alfabetizazion in lenghe furlane cul ûs des gnovis tecnologjiis (15 mil euros).
Pe ricercje sientifiche, a son destinâts 45 mil euros pal ampliament dal Corpus de lenghe furlane cu la realizazion di un dizionari de lenghe furlane monolengâl (par furlan); po dopo, a son a disposizion 20 mil euros par promovi la ricercje sul lessic, su la onomastiche e su lis struturis dal furlan des origjins midiant de realizazion di un dizionari dal furlan antîc; 5 mil euros a son invezit a disposizion par promovi la lenghe furlane intes scuelis secondariis di secont grât e altris 5 mil euros a son disponibii par promovi la cognossince de prose leterarie in lenghe furlane di Carlo Sgorlon.
Infin, pal spetacul, 40 mil euros a son destinâts a promovi la lenghe furlane intal setôr musicâl, cinematografic, teatrâl e leterari cu la realizazion di festivai/spetacui di cualitât indreçâts ai zovins, cjapant dentri ancje chês altris minorancis linguistichis europeanis; altris 5 mil euros a laran a promovi la presince di spetacui e la ativitât di promozion de lenghe furlane di cualitât pai zovins e pai fruts in manifestazions e events presints di plui di dîs agns sul teritori di lenghe furlane des ex provinciis di Gurize o di Pordenon.
Lis domandis a varan di rivâ dentri des oris 12.00 dai 22 di Jugn dal 2020, cun spedizion esclusive vie PEC ae direzion arlef@certgov.fvg.it. I contignûts complets di ogni bant e lis modalitâts di presentazion des domandis si puedin consultâ tal sît www.arlef.it.
Altris informazions si puedin vê clamant 0432.555812, o scrivint ae direzion di pueste eletroniche: arlef@regione.fvg.it
ARC/EP
Udin, ai 23 di Mai - Si invie cu la innomenade naine furlane “Ursule parussule” il gnûf carton animât de ARLeF - Agjenzie Regjonâl pe Lenghe Furlane - che al insegne ai fruts regulis impuartantis di igjiene.
Protagoniscj a son Free e Ulli: un grant crot e une piçule moscje, personaçs che i fruts a àn imparât a volêur ben cu la trasmission televisive “Maman!”. Te storie “Free&Ulli e lis besteatis”, chescj doi personaçs simpatics si lavin ben lis mans: ai fruts ur bastarà imitâju par fâlu te maniere juste e pal timp che al covente.
Free & Ulli a nassin de fantasie de ilustradore Patrizia Geremia e a dan vite aes storiis de golaine di libris editade di Futura Edizioni, che la ARLeF i à afidât ancje la creativitât di cheste serie “speciâl”. Lis vôs prestadis ai personaçs a son chês di doi atôrs furlans cognossûts, Claudio Moretti e Elvio Scruzzi, intant che la vôs che e conte e je chê di Daria Miani, compagne di zûcs e di aventuris tant amade dai frutins, e condutore de famose trasmission Maman! dulà che Free&Ulli a son di cjase.
«Il progjet – al spieghe il president de ARLeF, Eros Cisilino – al è nassût de colaborazion cu la Protezion civîl regjonâl, sul imprin tant che schede a fumets. Ma, sigûrs de simpatie e soredut de empatie che i doi personaçs a varessin alimentât tra i frutins, o vin inviât dal moment ancje la realizazion dal carton animât: al è chest, dal sigûr, un strument ancjemò plui valit par incoragjâ i fruts a cjapâ sù tantis abitudins coretis. Cumò lu metìn a disposizion di ducj chei comuns dal teritori furlan che a volaran condividilu midiant dai lôr canâi di comunicazion. Il nestri obietîf al è chel di metisi dongje dai gjenitôrs, dai nonos e dai insegnants che a son impegnâts tal percors fondamentâl di educazion ae salût dai frutins. Doprâ il furlan al rint il messaç plui diret, ma soredut al sburte a chel aprendiment plurilengâl che, come che a disin i studis sientifics, al puarte cun se vantaçs grandonons, e tra chei un disvilup cognitîf plui grant e la pussibilitât di jessi plui pronts ai cambiaments».
ARC/EP
